شہباز شریف تے حمزہ دی پیرول اُتے رہائی دی درخواست جمع

لہور( پنجابی میڈیا گروپ ) مسلم لیگ (ن) دے صدر و قائد حزب اختلاف شہباز شریف تے حمزہ شہباز دی پیرول اتے رہائی دی درخواست جمع کرا دتی گئی۔شہباز شریف تے حمزہ شہباز دی پیرول اتے رہائی دی درخواست ڈپٹی سیکرٹری جنرل مسلم لیگ (ن) عطا اللہ تارڑ نے جمع کرائی جہدے وچ استدعا کیتی گئی اے کہ شہبازشریف تے حمزہ شہباز نوں بیگم شمیم اختر دی تدفین وچ شرکت لئی پیرول اتے رہا کیتا جاوے۔ درخواست وچ مزیدآکھیا گیا اے کہ ماں دے دنیا توں رخصت ہو جان توں وڈاہورصدمہ کوئی نہیں، پورے ملک توں لوکائی نے تعزیت کرن لئی آنا اے۔ لہٰذا2ہفتے لئی شہباز شریف تے حمزہ شہباز نوں فوری طور اتے پیرول اتے رہا کیتا جاوے۔