اسلام آباد ہائیکورٹ نے نوازشریف نوں اشتہاری قرار دین دی کاروائی موخر کر دتی

اسلام آباد( پنجابی میڈیا گروپ) ہائی کورٹ نے نوازشریف نوں اشتہاری قرار دین دا معاملہ موخر کر دتا۔ جسٹس عامر فاروق تے جسٹس محسن اختر کیانی تے مشتمل اسلام آباد ہائی کورٹ دے خصوصی بنچ نے ایون فیلڈ تے العزیزیہ ریفرنس وچ نوازشریف دی سزا دے خلاف اپیلاں تے سنوائی کیتی۔ دفتر خارجہ نے نوازشریف دی بذریعہ اشتہار طلبی دی تعمیل رپورٹ عدالت وچ جمع کرواندیاں ہوئیاں آکھیا سابق وزیراعظم نوازشریف جان بوجھ کے عدالت وچ پیش نہیں ہو رہے، اوہ عدالت وچ زیر سماعت کیس بارے مکمل طور تے آگاہ نیں، پاکستان تے بیرون ملک پرنٹ تے الیکٹرانک میڈیا وچ اوہناں دے اشتہار جاری ہون دی خبر چلی اے، اوہناں دی لندن رہائش گاہ تے طلبی دا اشتہار رائل میل دے راہیں موصول کر لیا گیا اے۔ ایڈیشنل اٹارنی جنرل طارق کھوکھر عدالت دے ساہمنے پیش ہوئے تے نوازشریف دا اشتہار جاری ہون بارے رپورٹ جمع کرائی۔ نیب پراسیکیوٹر آکھیا اشتہار جاری ہون دے عمل وچ شامل افسران دا بیان ریکارڈ ہووے گا۔اسلام آباد ہائی کورٹ نے نوازشریف نوں اشتہاری قرار دین دا معاملہ بیانات قلمبند ہون تک موخر کر دتا۔ عدالت نے ریمارکس دتے تسلی کرنی اے کہ نوازشریف نوں حکم نامے توں آگاہ کرن دی ہر ممکن کوشش کیتی گئی اے۔