براڈ شیٹ وچ نیب دے افسر کمیشن منگ رہے نیں: شاہد خاقان عباسی

لہور(سٹی رپورٹر) مسلم لیگ نون دے رہنماتے پچھلے وزیرِ اعظم شاہد خاقان عباسی آکھدے نیں کہ براڈ شیٹ وچ نیب دے افسر کمیشن منگ رہے نیں۔اسلام آباد دی احتساب عدالت وچ ایل این جی ریفرنس دے سلسلے وچ پیشی دے موقع اتے مسلم لیگ نون دے رہنما تے پچھلے وزیرِ اعظم شاہد خاقان عباسی نے احاطہ عدالت وچ میڈیا دے نمائندیاں دے نال گل بات کردیاں ہویاں آکھیا اے کہ منصوبہ بند ی کیتی جاندی اے کہ کس طرحاں براڈ شیٹ نوں پیشہ دتا جاوے تے اپنا حصہ منگیا جاوے۔ شاہد خاقان عباسی ہوراں نے آکھیا اے کہ حکومتی کمیٹی ایہناں وزراء دی بنی اے جہڑی خود ایس چوری وچ شامل نیں۔ سرکار تے نیب اندھے ہوچکے نیں کہ ایہناں حقائق تے عدالتی فیصلے نظر نہیں آئوندے۔ جہناں دے ناں آرہے نیں اوہ ایہنی کٹہریاں وچ کھڑے ہون گے۔ پچھلے وزیراعظم نے مزیدآکھیا اے کہ ملک توں بار جانا میرا حق اے اجازت نہیں ملدی تے میں عدالت دا دروازہ کھٹکٹھاندا میں تن دن لندن وچ رکیا واں۔ نوازشریف دے نال میرا ہر روز رابطہ ہوندا اے۔ اوہناں نے آکھیا اے کہ چیئرمین نیب مظلو م آدمی نیں سرکار ایہناں بلیک میل کر رہی اے۔ ایتھے جج بلیک میل ہورہے نیں۔ شاہد خاقان عباسی نے مزیدآکھیا ایکہ نیب دے ادارے نوں بند کرکے ایس ملک نوں مصیبت توں نجات دلانی چاہیدی اے۔ نیب نوں میاں نوازشریف دے اک روپے دے اکائونٹس نہیں مل سکے۔ جج ارشد ملک نوں بلیک میل کر کے 3 واری دے وزیرِ اعظم نوں سزا دلوائی گئی،ایہہ نظام نہیں چل سکدا جتھے شرم وحیا ختم ہو جاوے۔