افغانستان وچ امن پورے خطے لئی ضروری اے: وزیر خارجہ شاہ محمود قریشی

اسلام آباد( پنجابی میڈیا گروپ) وزیر خارجہ شاہ محمود قریشی آکھیا اے پاکستان، افغانستان دے امن و استحکام تے تعمیر و ترقی لئی اپنا کردار ادا کرن لئی پرعزم اے۔ایہ گل اوہناں نے افغانستان دی مسعود فاؤنڈیشن دے چیئرمین احمد ولی مسعود نال گل کردیاں آکھی، جہناں نے وزارت خارجہ وچ اوہناں نال ملاقات کیتی۔ ترجمان دفتر خارجہ دے مطابق ملاقات دے دوران افغان امن عمل سنے باہمی دلچسپی دے امور تے تبادلہ خیال کیتا گیا۔ وزیر خارجہ نے آکھیا پاکستان، افغانستان وچ امن دا سبھ توں ودھ خواہش مند اے، ایس لئی پاکستان، افغان امن وچ خلوص نیت نال مصالحانہ کوششاں جاری رکھے ہوئے اے۔ پاکستان دی مصالحانہ کاوشاں دے نتیجے وچ امریکا تے طالبان وچکار مذاکرات کامیابی نال ہمکنار ہوئے تے امن معاہدہ طے پایا۔ وزیر خارجہ نے آکھیا اسیں سمجھنے آں کہ افغانستان وچ امن پورے خطے لئی ضروری اے، بین الافغان مذاکرات دا انعقاد، افغانستان دے مسئلے دے جامع تے مستقل سیاسی حل لئی انتہائی اہم موقع اے۔