ن لیگ جیتھوں چاہے دوبارہ الیکشن کرالوے، تحریک انصاف

اسلام آباد (پنجابی میڈیا گروپ) پاکستان تحریک انصاف نے آکھیا اے کہ قانونی طور تے الیکشن کمیشن رزلٹ روکن دا مجاز نہیں۔ مسلم لیگ ن نوں جہناں پولنگ سٹیشن اتے اعتراض اے اوتھے دوبارہ الیکشن کرالوے، مسلم لیگ ن باربار اپنا موقف تبدیل کر رہی اے۔ تفصیلات دے مطابق وفاقی وزیر فواد چودھری ‘عثمان ڈار و دیگر رہنماؤواں دے ہمراہ اسلام آبادوچ میڈیا دے نال گل کر رہے سن۔ اوہناں نے آکھیا الیکشن کمیشن آزاد ادارہ اے، اسیں ایہدا احترام کرنے آں۔ سانوں الیکشن اصلاحات دی طرف جانا ہووے گا۔ اسیں الیکٹرانک ووٹنگ لے آن جارہے آں۔ وزیراعظم عمران نے ہمیشہ شفاف چنا لئی کوششاں کیتیاں۔ 23 پولنگ سٹیشنز تے اعتراض اتے تحریک انصاف نے دوبارہ الیکشن دی پیشکش کیتی، مسلم لیگ ن بار بار اپنا موقف تبدیل کر رہی اے۔پی ٹی آئی رہنما عثمان ڈار داآکھنا اے کہ ن لیگ نے ہمیشہ دی طرحاں اپنا بیانیہ تبدیل کیتا۔ ڈسکہ دے عظیم لوکائی نے تحریک انصاف نوں ووٹ دتا۔ سارے نتائج ایہہ لوکائی تسلیم کر چکے سن۔ 337 پولنگ سٹیشن اتے پہلاں ن لیگ نوں کوئی اعتراض نہیں سی،اج الیکشن کمیشن وچ ایہناں لوکائی نے وڈا یوٹرن لیا۔ ڈسکہ دے لوکائی دے فیصلے دا دفاع کرن گے۔ سانوں الیکش کمیشن اتے پورا اعتماد اے۔