قومی اسمبلی اجلاس وچ ناخوشگوار واقعہ دا نوٹس، لیگی رہنما شاہد خاقان نوں لیٹر جاری

اسلام آباد: اسد قیصر نے قومی اسمبلی اجلاس دے دوران پیش آن والے ناخوشگوار واقعہ دا نوٹس لیندیاں لیگی رکن قومی اسمبلی شاہد خاقان عباسی نوں لیٹر جاری کردتا۔ شاہد خاقان عباسی دے غیر پارلیمانی رویے تے ایوان وچ بدمزگی دے واقعہ تے لیٹر جاری کیتا گیا۔ رکن قومی اسمبلی نوں اسمبلی دے قواعد و ضوابط دے قاعدہ 21دے تحت لیٹر جاری کیتا گیا۔ خط وچ آکھیا گیا کہ شاہد خاقان عباسی دے ایس طرز عمل نال اسمبلی دی کاروائی چلان وچ رکاوٹ پیدا ہوئی، لیگی رہنما نے اپنے طرز عمل نال قومی اسمبلی دی کاروائی وچ خلل پیدا کیتا۔خط دے متن وچ ہور آکھیا گیا کہ شاہد خاقان عباسی نے ایوان دی کاروائی وچ رکاوٹ پا کے سپیکر دے منصب دا مذاق اڈایا اے، لیگی رہنما خط جاری ہون دے 7دن دے اندر معذرت کرن تے اپنی پوزیشن واضح کرن، مقررہ ویلے تک جواب نہ آنا شاہد خاقان کول اپنے دفاع وچ کجھ نہ ہونا تصور ہووے گا۔