نیب نے چودھری برادران تے فیملیز دے خلاف انکوائریاں بند کرن لئی عدالت نال رجوع کر لیا

لہور: قومی احتساب بیورو (نیب) نے حکومتی اتحادی جماعت مسلم لیگ (ق) دے سربراہ چودھری شجاعت، سپیکر پنجاب اسمبلی پرویز الٰہی تے اوہناں دے خاندان دے بندیاں دے خلاف انکوائری بند کرن لئی عدالت نال رجوع کر لیا۔ نیب لہور نے چودھری شجاعت حسین، اوہناں دے پتراں سالک حسین تے چودھری شافع حسین دے خلاف انکوائری بند کرن لئی عدالت نال رجوع کیتا۔ سپیکر پنجاب اسمبلی چودھری پرویز الٰہی، اوہناں دی بیوی، پتراں مونس الٰہی، راسخ الٰہی تے 2عورتاں دے خلاف انکوائری بند کرن دا ریفرنس دائر کیتا گیا۔ لہور دی احتساب عدالت دے جج شیخ سجاد نے نیب ولوں ریفرنس بند کرن دی استدعا تے سماعت کیتی۔ نیب پراسیکیوٹر حافظ اسد نے عدالت وچ دلائل دتے جہدے وچ آکھیا گیا کہ نیب چودھری شجاعت حسین تے اوہناں دے صاحبزادیاں دے خلاف آمدن توں ودھ اثاثہ جات انکوائری کر رہیا سی، دوران تفتیش چودھری شجاعت حسین تے اوہناں دے صاحبزادیاں دے خلاف آمدن توں ودھ اثاثہ جات بنان دے شواہد موصول نہیں ہوئے۔

اپنا تبصرہ گھلو