ارباں روپے لُٹن والیاں نوں کدی معاوف نہیں کراں گے:چیئرمین نیب

اسلام آباد( پنجابی میڈیا گروپ)چیئرمین نیب جسٹس ریٹائرڈ جاوید اقبال ہوراں آکھیاکہ ہر طرح دی کرپشن نوں ختم کرن لئی معصوم پاکستانیاں دے ارباں روپے لُٹن والیاں نوں قنون دے مطابق نمٹاں گے۔چیئرمین نیب جسٹس ریٹائرڈ جاوید اقبال ولوں جاری بیان وچ آکھیا گیا اے کہ عالمی جی ڈی پی دا سالانہ پنج فیصد کرپشن دی نذر ہو جاندا اے۔ دُنیا نوں سالانہ دو اعشاریہ چھ ٹریلین ڈالر نقصان پہنچاندی اے۔اوہناں دا کہنا سی کہ نیب کرپشن دیخلاف کوشش نوں ترجیح دیندا رہے گا۔ اسیں ہر طرح دی کرپشن نوں ختم کرن اُتے یقین رکھدے آں۔ لیکن پاکستانیاں نوں کرپشن دی شکل وچ اک چیلنج دا ساہمنا اے۔اوہناں نے آکھیا کہ کرپشن ہی پاکستان دے سارے مسئلیاں دی جڑ اے۔ نیب چہرہ نہیں بلکہ کیس نوں ویکھدا اے۔ نیب دا تعلق کسی فرد یا سیاسی جماعت نال نہیں،پاکستان نال اے۔