پاکستان نے امریکا نوں سی پیک وچ سرمایہ کاری دی دعوت دے دتی

اسلام آباد: امریکا نوں پاک چین اقتصادی راہداری (سی پیک) وچ سرمایہ کاری دی دعوت امریکی وزیر تجارت ولبر راس دے دورہ پاکستان دے موقع تے دتی گئی۔ ایہ اہم گل مشیر تجارت عبدالرزاق داؤد اسلام آباد وچ پریس کانفرنس کردیاں کہی۔ اوہناں دا کہنا سی امریکی وزیر تجارت ولبر راس نے پاکستان دی دعوت تے وکھو وکھ پہلوواں دا جائزہ لین دا آکھیا اے۔ عبدالرزاق داؤد دا کہنا سی سی پیک امریکا لئی کھلا اے۔ ایس منصوبے وچ امریکی سرمایہ کاری تے کوئی پابندی نہیں اے۔

امریکا نے تیل تے گیس دے شعبہ وچ سرمایہ کاری دی یقین دہانی کرائی اے۔ اوہناں دا کہنا سی وزیراعظم عمران خان تے امریکی صدر ٹرمپ وچکار زبردست کیمسٹری بن چکی اے۔ افغان امن معاہدے دے بعد پاک امریکا دوطرفہ تعلقات ہور مضبوط ہون گے۔

اوہناں آکھیا اسیں امریکا دی منڈیاں تک رسائی حاصل کرنا چاہنے آں۔ امریکا نے وکھو وکھ سیکٹرز وچ پائی جان والی کمزوریاں دی نشاندہی کیتی اے۔

امریکا نال جی ایس پی دی سہولت تے گل ہوئی اے۔ مشیر تجارت دا کہنا سی امریکا نے ٹیفا دا اجلاس بلان دا اعلان کیتا اے۔ کمپنیاں دے دفاتر انڈیا، بنگلہ دیش تے کمبوڈیا وچ موجود نیں۔ امریکا توں ای کامرس، زراعت تے تیل تے گیس وچ سرمایہ کاری ودھان دا مطالبہ کیتا اے۔