آل پارٹیز کانفرنس7دی بجائے9فروری نوں ہوئے گی

اسلام آباد(پنجابی میڈیاگروپ)وزیراعظم شہباز شریف ولوں اہم قومی مسئلیاں اُتے7فروری نوں سَدھ لئی گئی آل پارٹیز کانفرنس دی تریخ تبدیل کردتی گئی ۔وزیراعظم دی ات گردی دے مسئلے اُتے بلائی گئی آل پارٹیز کانفرنس7فروری دی بجائے ہُن9فروری بروز جمعرات نوں اسلام آباد وچ منعقد ہوئے گی۔تفصیل دے مطابق پچھلے ہفتے وزیر اعظم شہباز شریف نے ملکی سیاسی منظر نامے اُتے وَڈی سیاسی پیش رفت دا اعلان کردیاں ہویاں3فروری نوں اہم قومی چیلنجاں اُتے سارے قومی،سیاسی قائدین نوںاک میز اُتے بٹھان دا وڈا فیصلہ کیتا سی،کانفرنس وچ پاکستان تحریک انصاف دے چیئرمین عمران خان سنے ساریاں قومی سیاسی جماعتاں دی قیادت نوں مدعو کیتا سی،30جنوری نوں پشور وچ پُلس لائنز دی مسجد وچ اَت گردی دے واقعے وچ101افراد شہید تے150توں وَدھ زخمی ہوگئے سن جس دے بعد اَت گردی سنے اہم قومی اہمیت دے مسائل تے معاملات اُتے سوچ وچار تے اتفاق رائے لئی آل پارٹیز کانفرنس سَدن دا فیصلہ کیتا گیا سی۔