آٹا تے چینی بحران دے ذمہ داراں دے خلاف کوئی ایکشن نہیں لیا گیا: حمزہ شہباز

لہور: پنجاب اسمبلی وچ اپوزیشن رہنما حمزہ شہباز شریف آکھیا اے مسلم لیگ (ن) نے کالی پٹیاں بنھ کے حلف لیا سی۔ آٹا تے چینی چور دا نعرہ اسمبلیاں وچ گونج رہیا اے پر بحران دے ذمہ داراں دے خلاف کوئی ایکشن نہیں لیا گیا۔

پنجاب اسمبلی دے باہر میڈیا نال گل کردیاں اوہناں دا کہنا سی نیب تے نیازی گٹھ جوڑ جہدے خلاف ثبوت نہ ہووے کیس بنا دیندا اے پر بی آر ٹی منصوبے وچ ارباں دی کرپشن تے نیب دی اکھاں بند ہو جاندیاں نیں۔ دسیا جاوے پشاور بی آر ٹی دا منصوبہ کیہ قیامت والے دن مکمل ہووے گا؟ پاکستانی معیشت آئی سی یو اُتے نہیں سگوں ختم ہو چکی اے۔

پاکستان دی سٹاک مارکیٹ کریش کر رہی اے۔ ڈالر دی قدر وچ مسلسل وادھا ہو رہیا اے۔ کنٹینر دے سارے وعدے جھوٹھ دا پلندہ ثابت ہوئے۔ ہزاراں فیکٹریاں نوں تالے لگ چکے نیں۔ مسلم لیگ (ن) نے میثاق معیشت دی گل کیتی تے جواب وچ چور تے ڈاکو آکھیا گیا۔

اپنا تبصرہ گھلو