دفاعی چیمپئن قلندرز نوں ہرا کے، سلطانز فائنل وچ اپڑ گئے

لہور( پنجابی میڈیاگروپ)ملتان سلطانز نے شاندار بولنگ دا مظاہرہ کردیاں ہویاں لہور قلندرز نوں84سکوراں توں شکست دے کے فائنل تک رسائی حاصل کرلئی ۔لہور قذافی سٹیڈیم وچ ہون والے پاکستان سپرلیگ 8دے پلے آف مرحلے وچ ملتان سلطانز نے ٹاس جت کے پہلاں بیٹنگ کردیاں ہویاں لہور قلندرز نوں161سکوراںدا ہدف دتا سی۔161سکور دے ہدف دے تعاقب وچ لہور قلندر دی پوری ٹیم 14.3اووراں وچ76سکور اُتے ڈھیر ہوگئی،ملتان سلطانز ولوں شیلڈن کوٹریل نے3،اسامہ میر2، انور علی، احسان اللہ، عباس آفریدی تے کیرون پولارڈ نے اک اک وکٹ حاصل کیتی ۔ ملتان سلطانز ولوں محمد رضوان 33 تے عثمان خان 29 تے رئیلی روسو 13 سوک بنا کے پویلین واپس چلے گئے جدکہ کیرن پولارڈ57 سکور بنا کے نمایاں رہے، لہور قلندرز ولوں حارث رف نے3، زمان خان تے راشد خان نے اک اک کھیڈاری آئوٹ کیتا ۔ یاد رہے کہ پی ایس ایل8 دے پہلے مرحلے دے10،10 میچز وچوں لہور قلندرزنے 7میچاں وچ جدکہ ملتان سلطانز نے 6 میچاں وچ کامیابی حاصل کیتی سی۔واضح رہے کہ لہور قلندرز 2022 وچ پی ایس ایل دی فاتح تے ملتان سلطانز رنز اپ رہی سی،لہور قلندرز نوں ہُن فائنل وچ جان لئی پہلا ایلیمینیٹر جتن والی ٹیم دے خلاف دُوجا ایلیمینیٹر جتنا ہوئے گا

اپنا تبصرہ گھلو