حکومت دا غریب شہریاں نوں پٹرول 100 روپے سستا دین دا اعلان

اسلام آباد(پنجابی میڈیاگروپ) وفاقی وزیرمملکت برائے پٹرولیم مصدق ملک نے غریب عوام لئی100 روپے سستا جدکہ امیرطبقے لئی پٹرول 100 روپے مہنگا کرن دا اعلان کیتا اے۔وزیرمملکت برائے پیٹرولیم مصدق ملک نے اسلام آبادوچ پریس کانفرنس کردیاں ہویاں آکھیا اے کہ امیرنوں100روپے وَدھ جدکہ غریب نوں 100روپے گھٹ پیٹرول ملے گا۔ایس دے علاوہ اوہناں نے غریب عوام لئی گیس وی سستی کرن دا اعلان کیتا اے۔ مصدق ملک داکہنا سی کہ اسیںغریب تے امیرآدمی دے 2پاکستان وَکھ کردتے نیں ، اسیں غریب دے پاکستان نال کھڑے ہواں گے ، پٹرول دی قیمت بارے6ہفتے اندرفیصلہ ہوئے گا ۔ اوہناں نے سابق وزیراعظم اُتے تنقید کردیاں ہویاںآکھیا کہ اوہ شخص جس دے ہتھ وچ آئین دتا گیا سی، جس دے ہتھ وچ ووٹ نہیں، مگر سلیکٹڈ زدہ دھاندلی دا کوئی کاغذ دتا گیا سی کہ اوس ملک دے غریب لوکاں دی حفاظت کرنا، تے اوہ کہہ رہیا اے کہ اوہناں ساریاں دی ایسی دی تیسی۔وزیر مملکت دا کہنا سی کہ میں وزیراعظم صاحب توں درخواست کیتی کہ ایتھے تے 2ملک نیں، امیر دا وَکھ تے غریب دا وَکھ، جس اُتے اوہناں نے آکھیاکہ غریب دے ملک دے نال کھڑے ہو جائو، اسیں ٹیرف وَکھ کرکے غریب دا بل تے امیر دا بل وَکھ کردتا۔