ایہ الیکشن توں باہر کرن لئی گرفتار کرنا چاہندے نیں،،عمران خان

لہور(پنجابی میڈیاگروپ)سابق وزیراعظم تے چیئرمین پاکستان تحریک انصاف عمران خان نے آکھیا اے کہ پاکستان وچ جمہوریت ’’پست ترین سطح‘‘ اُتے اے تے عدلیہ ہی واحد امید اے،ایہ الیکشن توں باہر کرن لئی گرفتار کرنا چاہندے نیں،ذہنی طوراُتے دوبارہ جیل جان لئی تیار ہاں ۔ غیر ملکی میڈیانوں دتے گئے انٹرویو وچ سیکیورٹی خدشات دے پیش نظر تحفظ فراہم کرن لئی گرفتار کیتے جان نال حکومتی مؤقف اُتے تبصرہ کردیاں ہویاں عمران خان نے آکھیا کہ ایہ بیوقوفانہ گل اے،پہلاں اوہ میرے گھر اُتے وی حملہ کرچکے سن، اوہ چاہندے سن کہ میں مجسٹریٹ اسلام آباددی عدالت وچ پیش ہواں جس دی میں پہلاں ہی یقین دہانی کرواچکیا ساں ایس لئی قنون مطابق اوہ ایس یقین دہانی بعد مینوں گرفتار نہیں کر سکدے سن، میں ضمانتی بانڈ وی مہیا کیتا مگر اوہ اوہناں نے قبول کرن توں انکار کردتا تے میرے گھر اُتے حملہ کردتا سی۔اوہناں نے آکھیا کہ مخلوط حکومت الیکشن توں خوفزدہ اے تے ایس الیکشن وچ اوہناں دی پارٹی ذریعے اپنا صفایا ہوجان دا خدشہ اے، لہذا اوہناں نے فیصلہ کیتا اے کہ اگر میں جیل وچ ہواں یا ماریا جاواں تے اوہ الیکشن دی اجازت دیون گے، میری پارٹی دی بیشتر قیادت نوں وی اوہناں نے گرفتار کرلئیا اے۔دوبارہ گرفتارکیتے جان دے امکان بارے سوال دے جواب وچ عمران خان نے آکھیا کہ میں ذہنی طور اُتے(دوبارہ) جیل جان لئی تیار ہاں۔