سپیشل کور کمانڈرز کانفرنس:9مئی دے واقعے اُتے آرمی ایکٹ تحت کارروائی دافیصلہ

راولپنڈی(پنجابی میڈیا گروپ)پاک فوج دے سربراہ جنرل سید عاصم منیر دی زیر صدارت خصوصی کور کمانڈرز کانفرنس ہوئی جس وچ9مئی دے واقعات اُتے آرمی ایکٹ تے آفیشل سیکرٹ ایکٹ تحت کارروائی کرن دا فیصلہ کیتا گیا اے۔جی ایچ کیو وچ ہون والی سپیشل کورکمانڈرز کانفرنس وچ ملک دے موجودہ حالات اُتے غور کیتا گیا،9مئی نوں شرپسنداںولوں جلا گھیرا تے فوجی تنصیبات اُتے حملیاں دی شدید لفظاں وچ مذمت کیتی گئی، رَلتیاں نے دسیا کہ آرمی رینک تے فائل وچ عسکری تنصیبات نوں نقصانات پہنچان اُتے شدید غم و غصہ پایا جاندا اے۔کور کمانڈرز کانفرنس وچ آرمی تنصیبات اُتے حملہ کرن والے افرادنوں پاکستان آرمی ایکٹ تے آفیشل سیکرٹ ایکٹ تحت ٹرائل ذریعے انصاف دے کٹہرے وچ لیان دااعادہ کردیاں ہویاں آکھیا گیا کہ ناقابل تردید شواہد دی بنیاداُتے افواج پاکستان اینہاں حملیاں دے منصوبہ سازاں، اکسان والیاں تے اوہناں دی حوصلہ افزائی کرن والے مجرماں توں بخوبی واقف نیں۔خصوصی کانفرنس وچ پچھلے دناں دے دوران امن و امان دی صورتحال دا جائزہ لئیا گیا، اک سیاسی جماعت دی قیادت نے محض سیاسی مفادات لئی لوکاں نوں استعمال کیتا، کسی وی حلقے ولوں قیام امن و امان وچ رکاوٹ پان والیاں نال آہنی ہتھاں نال نمٹن دا فیصلہ کیتا گیا۔کانفرنس نوں بریفنگ وچ دسیا گیا کہ شہیداں دیاں یاد گاراںدی بے حرمتی، تریخی عمارتاں نوں ساڑن تے فوجی تنصیبات دی توڑ پھوڑ ا تے اک منصوبے تحت عمل کرایا گیا تاکہ ادارے دی بدنامی ہو سکے، ایہ سارا عمل اک ذاتی سیاسی ایجنڈے نوں حاصل کر لئی سی۔

اپنا تبصرہ گھلو