9مئی وچ جیہڑا وی ملوث اے نہیں بچے گا،شہبازشریف

لہور(پنجابی میڈیاگروپ)وزیراعظم شہباز شریف نے آکھیا اے کہ9مئی دے واقعات وچ جیہڑا وی ملوث اے قنون دی گرفت توں نہیں بچ سکے گا،سویلین تنصیبات نوں نقصان پہنچان وچ ملوث سارے افراد اُتے انسداد دہشتگردی عدالت وچ مقدمہ چلایا جائے گا، فوجی تنصیبات اُتے حملیاں وچ ملوث افراد نوں آئین تحت انصاف دے کٹہرے وچ لیایا جائے گا،9مئی نوں عمران نیازی دے حکم اُتے اینہاں دے جتھیاں ملک دشمنی کیتی تے بدقسمتی نال اوہ کم کروکھایا جیہڑا75ورھیاں وچ دشمن وی نہیں کر سکیا۔وزیر اعظم شہبازشریف دی زیرصدارت لہوروچ اعلیٰ سطحی اجلاس ہویا جس وچ قومی سلامتی کمیٹی دے فیصلیاں اُتے پیشرفت دا جائزہ لئیا گیا ۔اجلاس وچ وزیراعظم نوں9مئی دے واقعات وچ ملوث کرداراں اُتے قنونی گرفت لئی ہُن تک دے اقداماں، گرفتاریاں تے قنونی پیشرفت اُتے بریفنگ دتی گئی ۔ وزیراعظم شہبازشریف نوں9مئی دے واقعات وچ ملوث کرداراں دی قنونی گرفت لئی ہُن تک دے اقداماں اُتے تفصیلی بریفنگ دتی تے جناح ہائوس اُتے حملہ کرن والیاں دیاں گرفتاریاں تے قنونی پیشرفت توں آگاہ کیتا۔ وزیر اعظم شہباز شریف نے آکھیا کہ اسیں ایتھے اہم مقصد لئی اکٹھے ہوئے ہاں۔اجلاس دا مقصد پچھلے ہفتے دے اجلاس وچ ہون والے معاملیاں داجائزہ لینا اے ۔وزیراعظم شہباز شریف نے آکھیا کہ9مئی نوں ملکی تریخ دے سیاہ تے تریخ دن دے طور اُتے یاد رکھیا جائے گا۔ایس دن پاکستان دے لبادے وچ اَت گردی تے ملک دشمنی کیتی گئی۔عمران نیازی نے اوہ کم کیتا جیہڑا 75ورھیاں وچ دشمن نہ کر سکیا۔ کالعدم ٹی ٹی بی نے قائد اعظم زیارت نوں ساریاں،عمران نیازی تے اوس دے جتھے نے قائد اعظم ہائوس لہور نوں ساریا ، کالعدم ٹی ٹی پی نے جی ایچ کیو اُتے حملہ کیتا سی،9مئی نوں پاکستان دشمناں نے فیر جی ایچ کیو اُتے حملہ کییتا،ریڈیو پاکستان پشور تے ایف سی سکول نوں ساریا گیا،بے شمار واقعات ہوئے جنہاں نے پوری قوم نوں ذہنی اذیت وچ مبتلا کیتا۔وزیراعظم شہبازشریف نے اکھیا کہ جناح ہائوس اُتے حملہ کرن والیاں نوں کسی صورت معاف نہیں کیتاجائے گا۔