9 مئی دے واقعات پاکستان مخالف ایجنڈے دی عکاسی نیں،وزیراعظم

کوئٹہ(پنجابی میڈیا گروپ)وزیراعظم شہباز شریف ہوراں آکھیا اے کہ9مئی دے واقعات پاکستان مخالف تے ات گرد ایجنڈے دی عکاسی کردے نیں، ایہ کوئی حب الوطنی نہیں، ات گردی تے پاکستان دشمنی اے،ساہنوں ات گردی ختم کرنی اے چاہے اوہ کوئٹہ ہوئے، پشور، کراچی یا لہور ہوئے یا فیر بلوچستان دے دور درواز علاقے ہون،اجے وی اَت گرد سر چُک رہے نیں لیکن اوہناں دا سر ضرور کُچلیا جائے گا،لہٰذا شہیداں تے غازیاں دی حرمت نوں سلام کرنا چاہیدا اے۔34ویں نیشنل گیمز دی تقریب نال خطاب کردیاں ہویاں شہباز شریف نے آکھیا کہ اج توں15 ورھے پہلاںات گردی نے پاکستان وچ تباہی مچائی سی تے کوئی وی شہر و علاقہ ات گردی توں نہ بچ سکیا لیکن بلاخر افواج پاکستان تے قنون نافذ کرن والے اداریاں نے مل کے ایہ فیصلہ کیتا کہ ساہنوں ایس ات گردی نوں ختم کرنا اے چاہے اوہ کوئٹہ ہوئے، پشور کراچی یا لہور ہوئے یافیر بلوچستان دے دوردرواز علاقے ہون ۔ وزیر اعظم نے آکھیا کہ ساڈی فوج دے جواناں، افسراں تے اوہناں دے بالاں نے قربانیاں دتیاں،جی ایچ کیو، پشور آرمی پبلک اسکول اُتے حملے ہوئے تے کس طرح اک منظم ات گردی نے پورے پاکستان نوں اپنی لپیٹ وچ لے لئیا سی لیکن پاک فوج دے جواناں نے ہر جگہ ات گرداں دا مقابلہ کرکے اوہناں نوں ختم کیتا۔اوہناں نے آکھیا کہ اجے وی ات گرد سر چُک رہے نیں لیکن اوہناں دا سر ضرور کچلیا جائے گا، لہٰذا شہیداں تے غازیاں دی حرمت نوں سلام کرنا چاہیدااے۔وزیراعظم نے آکھیا کہ9مئی دا واقعہ پاکستان دی تریخ وچ بڑا دلخراش سی، جس طرح اَت گرداں نے زیارت وچ قائد اعظم دے گھر اُتے حملہ کیتا اوسی طرح لہور وچ وی اوہناں دے گھرنوں راکھ بنادتا گیا، ایہ کوئی پاکستانی سوچ نہیں ہو سکدا، ایہ کم کوئی پاکستانی نہیں کر سکدا بلکہ ایہ ات گردتے پاکستان دشمن دا کم اے۔اوہناں نے آکھیا کہ9 مئی نوں ریڈیو پاکستان نوں ساڑیا گیا، جی ایچ کیو اُتے حملہ کیتا گیا، ایہ کوئی حب الوطنی نہیں، ات گردی تے پاکستان دشمنی اے،9مئی دا دن ہمیشہ پاکستان دی تریخ وچ سیاہ دن دے طور اُتے یاد رکھیا جائے گا۔