کَدوں تک الیکشن اگے کرکے جمہوریت قربان کردے رہواں گے،چیف جسٹس عمر عطا بندیال

اسلام آباد(پنجابی میڈیا گروپ)سپریم کورٹ دے چیف جسٹس عمر عطا بندیال نے پنجاب وچ الیکشن اُتے نظرثانی دیاں درخواستاں اتے سماعت دے دوران ریمارکس دتے نیں کہ کَدوںتک الیکشن اگے کرکے جمہوریت قربان کردے رہواں گے،کس طرح ممکن اے منتخب حکومت6مہینے، نگران حکومت ساڑھے4ورھے رہے، اسیں آئین دے محافظ ہاں تے ساہنوں ہرصورت ایس دا دفاع کرنا اے۔جمعرات نوں الیکشن کمیشن آف پاکستان، وفاقی تے صوبائی حکومتاں ولوںدائرنظرِثانی درخواستاں اُتے چیف جسٹس عمر عطا بندیال دی سربراہی جسٹس اعجاز الاحسن تے جسٹس منیب اختر اُتے مشتمل 3رکنی بینچ نے سماعت کیتی۔سماعت دے شروع اُتے وکیل الیکشن کمیشن سجیل سواتی روسٹرم اُتے آئے۔چیف جسٹس نے ریمارکس دتے کہ تیجا دن اے،الیکشن کمیشن دے وکیل دے دلائل سن رہے نیں،الیکشن کمیشن دے وکیل دے دلائل مختصر ہون، بھارتی سپریم کورٹ دے فیصلے اُتے کافی ویلا ضائع ہویا،ساہنوں دسوکہ تہاڈا اصل نقطہ کیہ اے۔سجیل سواتی نے آکھیا کہ سپریم کورٹ رولز آئینی اختیارات گھٹ نہیں کرسکدے،جسٹس اعجاز الاحسن نے ریمارکس دتے کہ سپریم کورٹ رولز عدالتی آئینی اختیارات نوںکس طرح گھٹ کردے نیں؟ہُن تک دا نقطہ نوٹ کر چکے نیں، تُسی اگے ودھو۔سجیل سواتی نے آکھیا کہ فل کورٹ کئی مقدمیاں وچ قرار دے چکی اے کہ نظرثانی دا دائرہ کار محدود نہیں ہُندا، ایس اُتے جسٹس منیب اختر نے ریمارکس دتے کہ تہاڈی منطق مَن لیئے تے سپریم کورٹ رولز عملی طور اُتے کالعدم ہو جان گے۔سجیل سواتی نے آکھیا کہ بعض اوقات ملاقات وچ پارلیمنٹ دی قنون سازی دا اختیاروی محدود اے، توہین عدالت دے کیس وچ لارجر بینچ نے قرار دتا کہ سپریم کورٹ دااختیارگھٹ نہیں کیتاجاسکدا، نظرثانی درخواست دراصل مرکزی کیس دا ہی تسلسل ہُندا اے۔

اپنا تبصرہ گھلو