سپریم کورٹ نے آڈیو لیکس تحقیقاتی کمیشن نوں ہور کم توں روک دتا

اسلام آباد(پنجابی میڈیا گروپ)آڈیو لیکس تحقیقاتی کمیشن دی تشکیل دے خلاف عمران خان سنے ہوراں دیاں درخواستاں اُتے حکم جاری کردیاں ہویاں سپریم کورٹ نے آڈیو لیکس تحقیقاتی کمیشن نوںہورکم توںروک دتا۔سپریم کورٹ نے آڈیو لیکس تحقیقاتی کمیشن اُتے حکم امتناع جاری کردیاں ہویاں جوڈیشل کمیشن دی تشکیل دا نوٹیفکیشن معطل کر دتا، جوڈیشل کمیشن دی تشکیل دے خلاف درخواستاںدا مختصر حکم نامہ جاری کر دتا گیا،کیس دی ہور سماعت31مئی نوں ہو گی، سپریم کورٹ نے جوڈیشل کمیشن دے خلاف چاراں درخواستاں قابل سماعت قرار دے دتیاں، سپریم کورٹ نے اٹارنی جنرل سنے ہور فریقاںنوں نوٹس جاری کر دتا ۔ چیف جسٹس پاکستان عمر عطا بندیال دی سربراہی وچ5رکنی لارجر بینچ نے فیصلہ سنا دتا ، بینچ وچ جسٹس اعجاز الاحسن، جسٹس منیب اختر، جسٹس شاہد وحید تے جسٹس حسن اظہر رضوی شامل سن۔وفاقی حکومت نے مبینہ آڈیو لیکس دی تحقیقات لئی جسٹس قاضی فائز عیسی دی سربراہی وچ کمیشن تشکیل دتا سی، مبینہ آڈیو لیکس دی انکوائری لئی قائم جوڈیشل کمیشن دے خلاف 4درخواستاں دائر کیتیاںگئیاں سن۔انکوائری کمیشن دے خلاف عمران خان، صدر سپریم کورٹ بار عابد زبیری، ریاض حنیف راہی تے مقتدر شبیر نے درخواستاں دائر کیتیاں سن، درخواستاں وچ مبینہ آڈیو تحقیقاتی کمیشن دی تشکیل دے نوٹیفکیشن نوں کالعدم قرار دین دی استدعا کیتی گئی سی ۔چیف جسٹس نے دوران سماعت ریمارکس دتے کہ حکومت کسی جج نوں اپنی مرضی دے مطابق بنچ وچ نہیں بٹھا سکدی، اسیں سوال پچھیا سی کہ 184 بی وچ لکھیا اے کم از کم 5 ججاں دا بینچ ہوئے، اگر تُسی ساڈے نال مشورہ کیتا ہُنداتے اسیں تہانوں دسدے،9 مئی دے واقعے دا فائدہ ایہ ہویا کہ جوڈیشری دے خلاف جیہڑی بیان بازی ہو رہی سی اوہ ختم ہوگئی۔چیف جسٹس نے اٹارنی جنرل نال مکالمہ کردیاں ہویاں آکھیا کہ تُسی ساڈے انتظامی اختیاروچ مداخلت نہ کرو، اسیں حکومت دا مکمل احترام کردے ہاں، عدلیہ بنیادی انسانی حقوق دی محافظ اے، حکومت نے چیف جسٹس دے اختیاراںنوں ریگولیٹ کرن دی قنون سازی چھیتی وچ کیتی، حکومت ساڈے نال مشورہ کردی تے کوئی بہتر رستہ وکھاندے، تُسی ضمانت تے فیملی کیساںنوں وی ایس قنون سازی دا حصہ بنادتا۔