نوازریف دی سزا معطل ضرور ہوئی پر اپنی تھاں موجود اے: فروغ نسیم

اسلام آباد: وفاقی وزیر قنون بیرسٹر فروغ نسیم آکھیا اے میاں نوازشریف دی سزا معطل ضرور ہوئی پر اپنی تھاں موجود اے۔ ایہ عبوری حکم اے، عدالت دا اجے تفصیلی فیصلہ آنا اے۔

وفاقی کابینہ اجلاس مگروں پریس کانفرنس کردیاں فروغ نسیم نے آکھیا ایڈیمنٹی بانڈ لینا کابینہ دا فیصلہ سی۔ کابینہ نے اتفاق رائے نال نوازشریف نوں چار ہفتے دی اجازت دتی سی۔ عدالت نے شہباز شریف نے ایڈیمنٹی بانڈ دے بجائے انڈر ٹیکنگ نوں من لیا۔ اوہناں آکھیا کریمنل جسٹس سسٹم دا ٹاسک وزیراعظم نے مینوں دتا سی، ایہدی بہتری لئی کم شروع ہو چکیا اے۔

وفاقی وزیر قنون بیرسٹر فروغ نسیم دا کہنا سی ایڈیمنٹی بانڈ ضمانتی بانڈ نہیں سی۔ شہباز شریف دے وکیلاں توں ایڈیمنٹی بانڈ یاں حلف نامہ منگیا سی۔

عدالت جا کے شہباز شریف دے وکلاء حلف نامے تے من گئے۔ اوہناں نے واضح کیتا جے نوازشریف واپس نہیں آن گے تے شہباز شریف تے توہین عدالت لگ سکدی اے۔اک اہم سوال دا جواب دیندیاں اوہناں دا کہنا سی عبوری حکم وچ عدالت زیادہ تر اپیل نہیں سن دی، فیصلے دے خلاف اپیل دی لوڑ پئی تے کراں گے۔

لہور ہائی کورٹ نے وی اک واری دی اجازت دتی۔ جدوں فائنل فیصلہ آوے گا، اودوں ویکھیا جاوے گا کہ قنونی چارہ جوئی کرنی اے یاں نہیں؟ معاون خصوصی برائے اطلاعات فردوس عاشق اعوان دا وفاقی کابینہ دے اجلاس مگروں میڈیا نوں بریفنگ دیندیاں کہنا سی ملکی تریخ وچ پہلی واری کرنٹ اکاؤنٹ خسارے وچ کمی آئی۔ معاشی اشاریاں وچ بہتری یقینا معاشی ٹیم دی کارکردگی دا ثبوت اے۔

معاشی اشاریاں وچ بہتری دے ثمرات جلدی عوام تک اپڑن گے۔ فردوس عاشق اعوان آکھیا غریب تے مستحق بندیاں نوں ریلیف دینا سرکار دی اولین ترجیح اے۔ موثر معاشی پالیسیاں نال مقامی تے بیرونی سرمایہ کاراں دا اعتماد بحال ہویا۔