وزیراعلیٰ پنجاب دی ہدایت تے ناکارہ گڈیاں، فرنیچر تے مشینری دی نیلامی مکمل

لہور: وزیراعلیٰ پنجاب عثمان بزدار دی ہدایت تے سرکاری دفتراں دی ناکارہ گڈیاں، فرنیچر تے مشینری دی نیلامی نال سرکاری دفاتر صاف تے کروڑاں روپے وی سرکاری خزانے وچ جمع ہو گئے نیں۔ وزیراعلیٰ پنجاب آکھیا اے پہلی خصوصی مہم جہدے لئی سرکار نے بغیر فنڈز جاری کیتے 75کروڑ روپے توں ودھ دے فنڈز جنریٹ کیتے۔ ساڈا ایہ اقدام دفتراں نوں صاف تے نظام نوں شفاف بنان دی چنگی مثال اے۔ ڈویژنل کمشنرز، ڈپٹی کمشنرز، محکمہ پلس تے دوجے انتظامی محکمیاں وچ قواعد و ضوابط دے مطابق نیلامی دا عمل مکمل کیتا گیا اے۔ عثمان بزدار آکھیا نیلامی توں حاصل ہون والی 75کروڑ روپے توں ودھ دی رقم صوبائی خزانہ وچ جمع کرائی جا چکی اے۔ ناکارہ گڈیاں، ناقابل مرمت مشینری، دہائیاں پرانا بوسیدہ فرنیچر تے دوجی شیواں دفاتر کم لئی آن والے لوکاں لئی دقت تے دفاتر وچ جگہ دے ضیاع دا وی سبب سن۔ دفتراں وچ عملے تے وزیٹرز لئی تھاں گھٹ جد کہ بے کار سامان نے زیادہ تھاں گھیر رکھی سی۔ عوام دی فلاح تے بے لوث خدمت دا جذبہ ہووے تے مسئلے حل کرکے وسائل پیدا کیتے جا سکدے نیں۔ تحریک انصاف دی سرکار دی صوبے وچ کفایت شعاری تے وسائل دے ٹھیک استعمال دی نظیر نہیں ملدی۔