شہباز شریف دے نزدیک پاکستان دا سب توں وڈا مسئلہ ٹی ٹی سکینڈل اے: شہباز گل

اسلام آباد( بھلیکھا ٹی وی ) معاون خصوصی شہباز گل دا کہنا اے شہباز شریف دے ذہن وچ سب توں وڈا مسئلہ ٹی ٹی سکینڈل اے جہدا اوہناں نے جواب دینا اے۔ مسلم لیگ (ن) دے صدر شہباز شریف ولوں الیکشن اصلاحات تے بلائے گئے حکومتی اجلاس دے بائیکاٹ دے اعلان تے ردعمل دا اظہار کردیاں معاون خصوصی شہباز گل دا کہنا اے شہباز شریف اک پاسے انتخابات تے سوال کردے نیں تے دوجے پاسے انتخابی اصلاحات دے اجلاس دا بائیکاٹ کر رہے نیں۔ شہباز گل آکھیا شہباز شریف دے ذہن وچ پاکستان دا سب توں وڈا مسئلہ ٹی ٹی سکینڈل اے جہدے وچ اوہناں نوں چھیتی جواب دینا اے، اک پاسے گلگت بلتستان نوں حساس قومی مسئلہ قرار دے رہے نیں تے اگلی ای ساہ وچ ایس مسئلے تے سرکار نال تعاون توں انکار کر رہے نیں۔ معاون خصوصی دا کہنا سی شہباز شریف دے سرکار نال تعاون لئی اک ای شرط اے کہ اوہناں نوں نیب کیساں وچ این آر او دتا جائے، ڈرامہ بازی نوں اوہناں توں بہتر کون جاندا اے، ووٹ نوں عزت والے ڈرامے دا ڈراپ سین قوم نے اجے ویکھیا اے، آس اے ایہ اے پی سی دی قرارداد دی پاسداری کرن گے۔