طلال چودھری نے ن لیگ تے پوری سیاست دا سر شرم نال نیواں کر دتا: فیاض چوہان

راولپنڈی( بھلیکھا ٹی وی ) وزیر اطلاعات پنجاب فیاض الحسن چوہان آکھیا اے طلال چودھری سابق وزیر تے موجودہ خاتون رکن اسمبلی نوں گھر جا کے ہراساں کردا اے۔ پنجاب سرکار نے ایس واقعہ دی تحقیقاتی کمیٹی بنا دتی اے جہنے کم شروع کر دتا اے۔ راولپنڈی وچ پریس کانفرنس کردیاں اوہناں دا کہنا سی طلال چودھری دی ساری فوٹیج خاتون ایم این اے دے گھر دے اندر دی اے۔ طلال چودھری نے اک نہیں سارے منتخب نمائندیاں تے حملہ کیتا۔ پلس نوں 15تے دوواں پاسیوں کال آئی۔ جے کجھ نہیں ہویا تے جعلی کال تے دوواں دے خلاف قنونی کاروائی کیتی جا سکدی اے۔ پلس نال تعاون نہیں کراں گے تے دوواں دے خلاف کاروائی ہووے گی۔ انوسٹی گیشن کمیٹی جہڑی رپورٹ دیوے گی اوہدے تے کاروائی ہووے گی، معاملہ ختم نہیں ہووے گا۔ اوہناں آکھیا رات دے 3وجے پہلی وار تنظیم سازی ویکھی اے۔ طلال چودھری نے ملسم لیگ تے پوری سیاست دا سر نیواں کر دتا اے۔ طلال نے ہن اپنی پارٹی دی ایم این اے نوں ہراساں کرنا شروع کر دتا۔اوہناں دا کہنا سی نوازشریف، شہباز شریف تے مریم 18ویں ترمیم دی آڑ وچ کرپشن بچان دی کوشش کردے نیں۔ ارباں روپے دی منی لانڈرنگ وچ پھڑے جان نوں جمہوریت تے حملہ قرار دیندے نیں۔ ڈرامہ بازی وچ لٹ مار ایسوسی ایشن نوں آسکر ایوارڈ ملنا چاہیدا اے۔

اپنا تبصرہ گھلو