سرکار صحابہ کرامؓ دی شان وچ گستاخی کرن والیاں نوں قنون دی گرفت وچ لوے: مفتی منیب

کراچی( بھلیکھا ٹی وی ) چیئرمین رویت ہلال کمیٹی مفتی منیب الرحمان نے مطالبہ کیتا اے سرکار صحابہ کرام ؓدی شان وچ گستاخی کرن والیاں نوں قنون دی گرفت وچ لوے۔ دارالعلوم نعیمیہ کراچی وچ آئمہ و خطباء دے اجتماع نال خطاب کردیاں مفتی منیب الرحمان دا کہنا سی اسیں کسے وی صورت دیس وچ فرقہ وارانہ تصادم نہیں چاہندے تے نہ اپنے عقیدیاں تے مفاہمت کراں گے، اسیں پہل نہیں کیتی سگوں اوہناں لوکاں نے پہل کیتی اے جہناں نے برملا صحابہ کرامؓ دی توہین کیتی، سرکار دی ذمہ داری اے کہ اوہناں نوں قنون دی گرفت وچ لوے تے اگلی وار اجہے واقعات دا سدباب کرے۔ مفتی منیب الرحمان نے آکھیا اسیں عوامی ریلیاں دا سلسلہ ایس لئی شروع کیتا کہ مسلماناں نوں اپنے جذبات دے پُرامن اظہار دا موقع ملے تے ساڈا احتجاج اہل اقتدار دے نوٹس وچ آئے تے سرکار اپنی آئینی، قنونی تے شرعی ذمے داریاں پوری کرے، جے اسیں لوکاں دے جذبات دے پُرامن اظہار دا موقع نہ دیندے تے کوئی انتہا پسند طبقہ ایہناں دے جذبات نوں اشتعال دوا کے منفی مقاصد لئی استعمال کر سکتا سی جو کسے وی صورت وچ ملک و ملت دے مفاد وچ نہیں اے۔

اپنا تبصرہ گھلو