شہباز دی گرفتاری اُتے نواز شریف نے اہم اجلاس بلا لیا : مریم نوں وڈیاں ذمہ داریاں ملن دا امکان

لندن (بھلیکھا ٹی وی ) مسلم لیگ نون دے قائد میاں محمد نواززشریف نے اپنے بھرادی گرفتاری توں بعد اک اہم آن لائن اجلاس بلا لیا ، ذرائع نے آکھیا کہ مریم نواز نوں وڈیاں ذمہ داریاں ملن دا امکان اے ۔ذرائع دے مطابق میاں شہباز شریف دی گرفتاری توں بعد نون لیگ دے قائد نواز شریف دے پارٹی دے کئی بندیاں نال رابطے جاری نیں ۔ اوہناں نے صورتحال توں ویکھ دیاں ہوئیاں اک اہم آن لائن اجلاس بلا لیا ۔میڈیا دے مطابق کہ اجلاس دے دوران مریم نواز نوں احتجاجی تحریک دی قیادت دتے جاون دا وی امکان اے ، پارٹی دے ہور معاملات نوں شاہد خاقان عباسی تے احسن اقبال ویکھن گے ۔ایس دے علاوہ نواز شریف نے اپنی صاحبزادی مریم نواز نوں فوری پریس کونفرنس رکھن دی ہدایت کر دتی اے ، مریم نواز ماڈل ٹائون سیکرٹریٹ وچ5وجے میڈیا نال گل بات کرے گی ۔ماڈل ٹائون وچ مسلم لیگ نون دی مرکزی قیادت وی موجود ہوئے گی جس وچ شہباز شریف دی گرفتاری توں بعد لیگی رہنماواں وچ اہم مشورے جاری نیں ۔