کورونا وائرس وچ وادھے تے شادی ہالز تے ریسٹورنٹس دے خلاف کریک ڈاؤن دا فیصلہ

اسلام آباد: وفاقی حکومت نے کورونا کیساں وچ وادھے پاروں ایس او پیز تے عملدرآمد نہ کرن والے شادی ہالز تے ریسٹورنٹس دے خلاف کریک ڈاؤن دا فیصلہ کیتا اے۔ وفاقی وزیر منصوبہ بندی اسد عمر دا کہنا اے دیس وچ ریسٹورنٹس تے شادی ہالز کورونا کیساں وچ وادھے کی وجہ بن رہے نیں۔ اسد عمر دا کہنا اے این سی او سی نے ایسے تناظر وچ سارے صوبیاں نوں ہدایت کیتی اے کہ ایس او پیز دی خلاف ورزی کرن تے شادی ہالز تے ریسٹورنٹس دے خلاف کریک ڈاؤن کیتا جائے۔

اسد عمر آکھیا اسیں کسے دے وی غیر ذمہ دارانہ رویے پاروں دوجیاں دی صحت نوں خطرے وچ پان دی اجازت نہیں دے سکدے۔ این سی او سی دے مطابق کورونا ایس او پیز دی خلاف ورزی تے کراچی وچ کاروائیاں جاری نیں تے شہر وچ 6شادی ہال، 103ریسٹورنٹس سیل کر دتے گئے۔ این سی او سی نے سارے صوبیاں بشمول گلگت بلتستان ، آزاد کشمیر تے اسلام آباد نوں ہدایت کیتی اے اوہ عوام دی صحت دے تحفظ لئی رہنما اصولاں نوں یقینی بنان۔

این سی او سی دا کہنا اے شادی ہال، ریسٹورنٹس دے کورونا مرکز بنن دا خدشہ اے۔ ریستوران تے شادی ہالاں دے خلاف کریک ڈاؤن دی وجہ بھی ایہو اے کہ ایہناں دوواں تھاواں تے خلاف ورزیاں دا سلسلہ جاری اے جو بیماری دا مرکز بن کے ابھر رہے نیں۔