اہم امور تے پاکستان تے ترکی دے موقف وچ مماثلت خوش آئند اے: وزیر خارجہ

اسلام آباد: وزیر خارجہ شاہ محمود قریشی دا ترک وزیر خارجہ میولوت چاوش اولو دے نال ٹیلی فونک رابطہ ہویا جہدے وچ دوواں وزرائے خارجہ نے دوطرفہ تعلقات تے علاقائی صورتحال سنے باہمی دلچسپی دے امور تے تبادلہ خیال کیتا۔ وزیر خارجہ شاہ محمود قریشی آکھیا اہم علاقائی تے عالمی امور دے حوالے نال پاکستان تے ترکی دے موقف وچ ممتاثلت خوش آئند اے۔ وزیر خارجہ نے مسئلہ کشمیر دے حوالے نال ترکی ولوں مسلسل واضح تے دوٹوک موقف اپنان تے ترک وزیر خارجہ دا شکریہ ادا کیتا۔

اوہناں دا ہور کہنا سی اقوام متحدہ جنرل اسمبلی دے 75ویں اجلاس وچ جیویں ترک صدر طیب اردگان نے نہتے کشمیریاں تے کیتے جان والے مظالم دے خلاف آواز چکی اے۔ ایہدے نال کشمیریاں دے حوصلے اُچے ہوئے نیں۔ پاکستان، افغان امن عمل سنے خطے وچ قیام امن لئی اپنا مثبت کردار ادا کرن لئی پرعزم اے۔

ترک وزیر خارجہ میولوت چاوش اولو نے افغانستان وچ قیام امن دی کاوشاں سنے خطے وچ قیام امن لئی پاکستان دے کردار دی تعریف کیتی۔ دوواں وزرائے خارجہ نے علاقائی تے باہمی دلچسپی دے امور تے مشاورتی سلسلہ جاری رکھن تے اتفاق کیتا۔ وزیر خارجہ ولوں ترک ہم منصب نوں دورہ پاکستان دی دعوت وی دتی گئی۔