سندھ وچ غیر اعلانیہ لوڈشیڈنگ: وفاقی حکومت تے نیپراتوں رپورٹ منگ لئی

اسلام آباد( بھلیکھا ٹی وی ) سپریم کورٹ نے سندھ وچ غیر اعلانیہ لوڈشیڈنگ اُتے وفاقی حکومت توں2 ہفتے وچ پریزنٹیشن تے نیپرا توں 4 ہفتے وچ رپورٹ منگ لئی ۔چیف جسٹس گلزار احمد دی سربراہی وچ 3 رکنی بینچ نے سندھ وچ غیر اعلانیہ لوڈشیڈنگ دے خلاف ازخود نوٹس کیس دی سماعت کیتی۔ چیف جسٹس نے ریمارکس دتے کہ کراچی وچ بتی دا مسئلہ اونج دا ونج ہی اے ۔ وفاقی تے صوبائی حکومتاں کجھ نہیں کررہیاں، لوکاں نوں ہائی جیک کیتا ہوئیا اے ، حکومت دی کمزوری توں سارے ادارے فائدہ چُک رہے نیں۔، ادھا کراچی اندھیرے وچ ڈوبیا ہندااے ، اخبارا ں وچ خبر لگی اے کہ کے الیکٹرک وچ کسی شرما تے ما کے شیئر نیں ۔اینج لگدااے کہ آخر وچ کمپنی دے تانے بانے ممبئی توںنکلن گے، جد کمپنی ممبئی توں کنٹرول ہوئے گی تو اینجتے ہوئے گا۔چیف جسٹس نے آکھیا کہ کے الیکٹرک دے سرمایہ کاراں اُتے شبہات نیں ا یہ شان عشری کون اے ؟ کیہ ایہ پاکستانی نیں؟ ایس اُتے شان عشری نے آکھیا کہ ایس دا پورا نام شان عباس عشری اے اوہ پاکستانی اے وفاداری اُتے شک نہ کیتاجائے۔ چیف جسٹس نے آکھیا کہ اگر تُسی پاکستان نال وفادار ہندے تے کے الیکٹرک تے پاکستان دی عوام دا ایہ حال نہ ہندا، ایہ کہانی ایتھے ختم نہیں ہوئے گی، اوہناں دی پشت اُتے کوئی ہور اے ۔