شہباز شریف تے اوہناں دے ہانیاں دے کول لُٹ مار دا کوئی جواب نہیں: شہزاد اکبر

لہور(بھلیکھا ٹی وی ) شہزاد اکبر نے آکھیا اے کہ بے نامی اکائونٹاں توں22ارب روپے توں ودھ دی منی لانڈرنگ کیتی گئی، چھوٹے ملازماں دے ناماں دے بوہت اکائونٹ کھولے گئے، سارے اکاونٹ سلمان شہباز آپریٹ کردے سن،7ارب دے اثاثیاں بارے ریفرنس دائر ہوچکیا اے۔معاون خصوصی شہزاد اکبر نے پریس کانفرنس کردیاں ہوئیاں آکھیا جد تفتیش ہندی اے تے بوہت ساریاں چیزاں سامنے آندیاں نیں، اج وی قوم نوں گمراہ کرن دی کوشش کیتی جا رہی اے، ایہ کاروبار دے بھیس وچ کرپشن کردے سن، ساڈے کول وڈے ثبوت موجود نیں، شہباز شریف تے اوہناں دے ہانیاں دے کول کوئی جواب نہیں، عدالت وچ شہباز شریف چین دے حبیب جالب نظر آندے نیں، کرتوتاں توں آپئی پھڑے جا رہے نیں، الزام میرے اُتے لا رہے نیں، شہباز شریف نے ٹوائلٹ دے نل توں کیمرے لبھن دی کوشش کیتی اے۔