سی سی پی او لہوردا ایس پی سی آئی اے نال جھگڑا، گرفتاری دا حکم دے دتا

لہور( بھلیکھا ٹی وی ) سی سی پی او عمر شیخ نے ایس پی سی آئی اے عاصم افتخار نال جھگڑے اُتے اوس دی گرفتاری دا حکم دے دتا۔تاہم عاصم افتخار غصے وچ میٹنگ چھڈ کے چلے گئے۔سی سی پی او عمر شیخ دا قہر چھوٹے ملازماں توں بعد ہن ایس پیز اُتے وی نازل ہونا شروع ہو گیا،ذرائع دے مطابق عابد ملہی کیس وچ اعتماد وچ نہ لین اُتے سی سی پی او دی ایس پی سی آئی اے نال تلخ کلامی ہوئی۔سی سی پی اونے ایس پی سی آئی اے نوں فوری سیف سٹی دے دفتر بلا لیا سی ۔ لیٹ ہون اُتے ایس پی سی آئی اے دی گرفتاری دے احکامات دے دتے۔گرفتاری دے حکم اُتے ایس پی عاصم افتخار نے شدید رد عمل دتا تے میٹنگ چھڈ کے چلے گئے۔سی سی پی او عمر شیخ نے عاصم افتخار توں سارے مراعات واپس لین دے وی احکامات دتے۔ سی سی پی او نے ایس پی سول لائنز نوں بلا کے مقدمہ دے اندراج لئی استغاثہ لکھ دتا تاہم افسراں دی مداخلت اُتے استغاثہ اُتے تاحال کوئی کاروائی نہیں کیتی گئی، ایس پی سی آئی اے نوں عہدے توں ہٹان دا فیصلہ وی کر لیا گیا۔