‘اپوزیشن جماعتاں دا ایجنڈا ملک دی ترقی نوں روکنا تے اپنی کرپشن نوں تحفظ دینا اے’

لہور( بھلیکھا ٹی وی) وزیراعلی عثمان بزدار نے آکھیا کہ اپوزیشن جماعتاں دا ایجنڈا ملک دی ترقی نوں روکنا تے اپنی کرپشن نوں تحفظ دینا اے، اپوزیشن جماعتاں دا اتحاد غیر فطری اے، اوہ دن دور نہیں جد ایہ اتحاد وی ماضی دی طرح پارہ پارہ ہو جائے گا۔وزیراعلی پنجاب عثمان بزدار نے اپنے بیان وچ آکھیا کہ اپوزیشن جماعتاں نوں عوام دے حقیقی مسلیاں دا ادراک اے نہ کوئی سمجھ، ایہ عناصر محض ذاتی مفادات دی خاطر عارضی طور اُتے اک نظر آرہے نیں، پاکستان دی عوام اپوزیشن دے دوغلے چہریاں نوں پہچان چکے نیں، ایہ اپنے منفی بیانیے نال عوام نوں گمراہ نہیں کر سکدے، اپوزیشن جماعتاں وزیراعظم عمران خان دی قیادت وچ ترقی دے پائیدار سفر توں خائف نیں، ایہ عناصر موجودہ حکومت دی2 وریاں دی محنت نوں برباد کرن اُتے تلے ہوئے نیں، اپوزیشن جماعتاں جنا مرضی واویلا کر لین حکومت مدت پوری کرے گی، اپوزیشن جماعتاں دے ہتھ نہ پہلاں کجھ آیا تے نہ اگے کجھ آئے گا۔