کورونا ایس او پیز عمل نہ کیتا گیا تے سرکار سخت اقدامات کرے گی: اسد عمر

اسلام آباد: وفاقی وزیر منصوبہ بندی اسد عمر نے آکھیا اے دیس وچ پچھلے دیہاڑ کورونا دے مثبت کیساں دی 50دن دے دوران بلند ترین شرح نوٹ کیتی گئی اے۔ اپنی ٹوئٹ وچ اسد عمر آکھیا پچھلے دیہاڑ کورونا دے مثبت کیساں دی شرح 2.37فیصد رہی، کورونا دے مثبت کیساں دی شرح 50دن وچ سب توں ودھ اے۔ آخری وار کورونا مثبت کیساں دی ایہ شرح 23اگست نوں سی۔

وفاقی وزیر نے آکھیا پچھلے چار دن دے دوران کورونا توں یومیہ موتاں دی اوسط 11اے۔ ایہ سب کورونا دے دوبارہ ودھن دی نشانیاں نیں۔ اسد عمر نے ہور آکھیا مظفر آباد وچ کورونا مثبت آن دی شرح بلند ترین اے، ایہدے علاوہ کراچی وچ وی ایہدی شرح زیادہ اے، لاہور تے اسلام آباد وچ کورونا کیس ودھ رہے نیں، ایہو موقع اے کہ اسیں سب کورونا توں بچاؤ لئی حفاظتی اقدامات نوں سنجیدہ لیئے۔ دوجی صورت وچ سرکار نوں سخت اقدامات کرنے پین گے۔