کیپٹن صفدر گرفتاری،بلاول دا آرمی چیف تے ڈی جی آئی ایس آئی توںتحقیقات دا مطالبہ

کراچی: پیپلزپارٹی دے چیئرمین بلاول بھٹو زرداری دا کہنا اے آرمی چیف جنرل قمر جاوید باجوہ تے ڈی جی آئی ایس آئی لیفٹیننٹ جنرل فیض حمید توں مطالبہ کرنا آں کہ اوہ کل دے واقعے دی تحقیقات کروان۔ کراچی وچ پریس کانفرنس کردیاں بلاول بھٹو زرداری دا کہنا سی قائد دے مزار تے نعرے لاؤن تے ایناں طوفان کھڑا ہو گیا، کل جہڑا معاملہ ہویا اوہ انتہائی شرمناک اے، ایہدی جنی مذمت کیتی جائے گھٹ اے، میں شرمندہ آں تے اپنا منہ وکھان دے قابل نہیں آں کہ ایہ کیویں ہو گیا، پروہنیاں نوں انج ہراساں کرکے گرفتار کرنا شرمناک اے تے سندھ دے عوام دی توہین اے۔ بلاول بھٹو زرداری آکھیا کون سن جہناں نے رات 2وجے آئی جی دے گھر دا گھیراؤ کیتا، پلس دے افسران چھٹی تے جا رہے نیں، اوہناں دی عزت دا مسئلہ بن گیا اے۔

بلاول نے آکھیا جے ایہ سانوں بدنام کرن دی سازش سی تے ایہ بہت برا مشورہ دتا گیا، جیویں وی ہویا ایس واقعہ نوں برداشت نہیں کر سکدے۔ سب چاہندے نیں قنون دے دائرے وچ کم کریئے۔ صوبہ اپنی تحقیقات کرے گا، ادارے وی تحقیقات کرن، سب اپنی عزت لئی کم کردے نیں۔ پلس دے ایس ایچ او توں لے کے اعلیٰ افسراں تک سب سوال کر رہے نیں، وزیراعلیٰ نے تحقیقات دا اعلان کیتا اے، اوہ تحقیقات ہووے گی۔ بلاول نے آکھیا کراچی دا جلسہ عمران خان دے خلاف کھلا ریفرنڈم سی، ایہ جلسہ ساڈی امید توں ودھ کامیاب سی، سیاسی ایشو ہوندے نیں پر ریڈ لائن کراس نہیں ہونی چاہیدی، ایہ تاثر چنگا نہیں اے۔ ایہ ادارے سب دے ہوندے نیں، عوام نے پاکستان پیپلزپارٹی نوں تریخی مینڈیٹ دتا۔