غزل

empty profile

مجاہداقبال مجاہد

بے قدرے بے ڈھنگے یار
چھڈ دے سبھ تلنگے یار
عاشق اوتھے سجدے کردے
جہڑی تھاں توں لنگھے یار
کردے بھاویں بے وفائی
لگدے فیر وی چنگے یار
شگناں دی میں مہندی سمجھاں
لہو چ ہتھ نیں رنگے یار
لٹ لٹا کے ہن پیا آکھاں
کاہنوں لے لئے پنگے یار
نفرت دے اس دور چ بندہ
اک دوجے نوں ڈنگے یار
دل نوں لٹے جد وی پاوے
کپڑے رنگ برنگے یار
اوہ کدھر دا سائو ہونا
جس دے ہون لفنگے یار
لوکاں نوں پیا درشن دیوے
ساڈے کولوں سنگے یار
کاہدی ایہہ ترقی دسو
جثے ہو گئے ننگے یار
ہور نہ منگے کجھ مجاہدؔ
کر دعاواں منگے یار

اپنا تبصرہ گھلو