کلیاں عشق نہ چکیا جاوے

ارشاد کھوکھر

کلیاں میتھوں چک نہ ہووے عشق دا بھارا توڑا
آ جا دوویں رل کے چکیے بھار لگے گا تھوڑا
نال ہوویں گی جے توں میرے مُک جاوے گا پندھ
مٹھیاں مٹھیاں تیریاں گلاں سینے پاندیاں ٹھنڈ
کلاّ سوہنا کوئی نہ لگے سوہنا لگے جوڑا
کلیاں میتھوں چُک نہ ہووے عشق دا بھارا توڑا
سوچی پئی ایں کہڑی گلوں سوچن دا نہیں ویلا
تھاں تھاں ٹھیڈے لگن گے نی ہو گیا جے کویلا
دُکھے گا فیر سارا پنڈا جیویں دُکھے پھوڑا
کلیاں میتھوں چُک نہ ہووے عشق دا بھارا توڑا
پیار نوں اپنی جھولی پا کے چھڈ دے توں شرمانا
تیریاں شرماں تینوں اک دن وختاں دے وچ پانا
ایہو شرماں تیری راہ دا بن جانا ایں روڑا
کلیاں میتھوں چک نہ ہووے عشق دا بھارا توڑا
لے کے ناں ہن رب دا بلیے عشق دا بھار ونڈا لے
دنیا داری چھڈ کے پریتاں عشق دے ناویں لا لے
چھیتی کر لے کدھرے بھیڑی موت نہ دئے سنوڑا
کلیاں میتھوں چک نہ ہووے عشق دا بھارا توڑا
عشق اللہ تے اللہ عشق اے دوویں بڑے پیارے
لوں لوں وچ رچا لے لاندے ڈبے ہوئے کنارے
مر جائے ارشادؔ وچارا جے توں پائیں وچھوڑا
کلیاں میتھوں چک نہ ہووے عشق دا بھارا توڑا