غزل

beera g

بیراجی

شیشے کھڑیا پھُل وی لوکی پٹنا چاہندے
سُفنے وچ سبھ دی دولت لٹنا چاہندے
نویں نسل دے بچیاں دے ورتارے وکھرے
ساکاں‘ ساتھیاں نوں مونہہ پرنے سُٹنا چاہندے
اپنی پرھیا دے وچ سد کے آپے لوکی
اک دوجے توں پہلاں آپے اٹھنا چاہندے
مہنگائی پاروں اکّے نیں‘ بال ایانے
ویلے دے آگو نوں بنھ کے کٹنا چاہندے
کیہ سکّے کیہ سجن اک دوجے نوں سارے
مٹی اکھاں دے وچ پا کے مٹھنا چاہندے
پیار محبت دی وی ریت اولّی ہوئی
سچے عاشق وی گل گل تے رُٹھنا چاہندے
تسبیح وی نہیں چھڈدے داء وی لاندے رہبر
مال یتیماں سکیاں دا وی گھٹنا چاہندے
نندن کمی لفظ‘ نوں انج تے سارے لوکی
سبھ سویرے کم کاجاں وچ جٹنا چاہندے
کوئی اڈیک نہیں کردا بیراجیؔ پت جھڑ دی
ساوے پتر ہن تے ٹہنیوں ٹُٹنا چاہندے

اپنا تبصرہ گھلو