جے کر تینوں چٹھی پاواں

رئوف شیخ

جے کر تینوں چٹھی پاواں
کیہ لکھاں گا میں سرناواں
پیاری لکھاں سوہنی لکھاں
رانی یا من موہنی لکھاں
جند حیاتی یا دل لکھاں
یاں سدھراں دی منزل لکھاں
محرم لکھاں سجن لکھاں
اپنے دل دی دھڑکن لکھاں
یار لکھاں یا بیلی لکھاں
یاں ہمراز سہیلی لکھاں
ساتھی لکھاں ہانی لکھاں
بجھن ہار کہانی لکھاں
متر لکھاں میت چا لکھاں
رُت بہار دا گیت چا لکھاں
تلے دی کوئی تار چا لکھاں
پھُلاں ورگی تار چا لکھاں
سُر چا لکھاں لے چا لکھاں
ہیریاں ورگی شے چا لکھاں
سمجھوں باہر سوال چا لکھاں
اچرچ ان بھول خیال چا لکھاں
بیلے دی کوئی ہرنی لکھاں
مصر دی جادوگرنی لکھاں
سوہل ملوک جیہی جٹی لکھاں
یاں سُوتر دی اٹی لکھاں
پیار دی پینگ دا جھُوٹا لکھاں
اپنی رُوح دا چین چا لکھاں
پران چا لکھاں نین چا لکھاں
کیوں چنبے دی کلی نہ لکھاں
یاں مشری دی ڈلی نہ لکھاں
تینوں پھُل گلاب دا لکھاں
یاں فیر جام شراب دا لکھاں
لمیاں زُلفاں والی لکھاں
بانکی یاں متوالی لکھاں
تینوں ات مُٹیار چا لکھاں
اپنا سجرا پیار چا لکھاں
اسماناں تے تارا لکھاں
تینوں عالم سارا لکھاں
یاں فر چن دا ٹکڑا لکھاں
اپنے گیت دا مُکھڑا لکھاں
یاں فر اپنی جان چا لکھاں
غزلاں دا دیوان چا لکھاں
تینوں اپنی ہیر نہ لکھاں
متھے دی تقدیر نہ لکھاں
الھڑ مست جوانی لکھاں
اپنے دل دی رانی لکھاں
تینوں دین ایمان چا لکھاں
اپنا مان تران چا لکھاں
تینوں طور دا نور نہ لکھاں
یاں فردوس دی حُور نہ لکھاں
سرناواں نہیں جچدا مینوں
جھُوٹ کدی نہیں پچدا مینوں
میں نہیں لکھدا تینوں چٹھی
بھاویں توں ای کیڈی مٹھی
جے کر تینوں چھٹی پاواں