غزل

افضل طاہر وزیر آبادی

محتاجی دی زندگی سجنو کسے وی حال اچ چنگی نہیں
چھڈ دے جہڑا اوکھے ویلے ہندا اوہ وی سنگی نہیں
لنگھ گئی عمر حیاتی ساری عمل نہ کیتے چنگے
دن محشر دا اوکھا پینڈا اینی غفلت چنگی نہیں
لوکاں نال توں کریں فراڈ لالچ نہ مُکے تیری
ناپ تول وچ گھاٹا کر کے روزی ہوندی چنگی نہیں
بے نسلے دی یاری نالوں بندا کلا ای چنگا
مطلب دے سب یار بنانا گل ایہ سجنا چنگی نہیں
سب دا رازق سب دا مالک سب دا خالق اللہ اے
دنیا اتے رہ کے افضل ناامیدی چنگی نہیں