آکھن لوک سیانے

Ahsan Bajwa

باراں واٹاں’ اٹھاراں پَینڈے
معنے: واٹاں: سفر۔
ویروا: ایس اکھان وِچ مت دِتی گئی اے پئی کئی لوک ساری عُمر پَینڈے ای پئے رہندے نیں اتے پَینڈا کردے کردے ای ہف جاندے نیں اتے اوہناں نُوں نِت نویں پینڈے پیندیاں پیندیاں اوڑک مؤت آ جاندی اے پر اوہناں دے پینڈے نہیں مُکدے۔
بارہیں کوہیں اپنی مجھ دا ای دُدھ پیوی دا اے
معنے: مجھ: بھینس٭پیوی دا : پیتا جاندا اے
ویروا: ایس اکھان وِچ مت دِتی گئی اے بندہ جے کِسے نال چنگا ورت دا ہووے گا تاں اوہ جِتھے وی جاوے گا اوس دی خِدمت کرن والا اوس نُوں کوئی نہ کوئی مِل ای جاوے گا۔ایس جگ اندر بندہ اپنا کیتا ای پاندا اے اتے جو آپوں کِسے نال چنگا نہیں ورتدا اوس نال وی کوئی چنگا نہیں ورتدا۔
بارہیں ورہیں اروُڑی دی وی سُنی جاندی اے
معنے: ورہِیں: سالِیں٭ ارُوڑی: گند دا ڈھیر۔
ویروا: ایس اکھان وِچ مَت دِتی گئی اے پئی سدا کدی کِسے تے بُرے دِن نہیں رہندے اتے رب سائیںاوڑک ماڑیاں دا پھِرکا وی پھیر ای دیندا اے۔اتے اوہناں تے وی چنگے دِن آ ای جاندے نیں اتے اوہ وی سؤکھے ہو جاندے نیں۔
بازِیں تے کھُوہِیں دا مُل کَیئں نہیں بھریا
معنے: بازِیں: بازاں٭ بھریا: ادا کیتا۔
ویروا: ایس اکھان وِچ مت دِتی گئی اے پئی باز وی مہنگا جناور اے اتے کھوہ کھٹن وی سؤکھا کم نہیں ایس لئی بازاں نُوں خرِیدن اتے کھوُہاں نُوں خرید کرن ایڈا سؤکھا کم نہیں ہوندا اتے ایہ ہاری ساری دا کم نہیں ہوندا۔
بالا کِکر دا’ شورا تِتر دا’ چُوہڑا لِتّر دا
معنے: کِکر: کِیکر٭ تِتّر: تِیتر٭ لِتّر: جُتّی
ویروا: ایس اکھان وِچ مت دِتی گئی اے پئی چھت واسطے کِکر دی لکڑ دا بالا چنگا رہندا اے اتے اوہ سڈیاں بدھی ہنڈ دا اے۔ اتے کھان لئی تِتّر دا شورا بڑا ای سوادی ہوندا اے تے چُوہڑے دے سِر تے چھِتّررہوے تاں اوہ کم کردا اے نہیں تاں ویسرا ہو جاندا اے اتے اگہا پِچھا کرن لگ پیندا اے۔٭

اپنا تبصرہ گھلو