دھیے چھٹی ہندی نہیں مزدوراں دی

Ahamed Naaeem Arshad

آکھن لگی پیو نوں دھی منظوراں دی
سنیا اے اج چھٹی اے مزدوراں دی
ابا جی اج چھٹی اسیں مناواں گے
اپنے سارے دکھ تے درد بھلاواں گے
ٹالھی تھلے اپنی منجھی ڈھاواں گے
کٹھے رج دپہر نوں روٹی کھاواں گے
اپنے ہتھیں چاہ دا کپ پلاواں گی
ہولی ہولی پکھی جھول سلاواں گی
لوڈھے ویلے سوں کے جد اٹھ جاوو گے
دِھیے دِھیے کہہ کول بلاوو گے
ابا جی میں نسی نسی آواں گی
جھجھر وچوں پانی نال لیاواں گی
اباجی! او میرے سوہنے ابا جی!
سن کے گلاں کہندا ابا سن کڑیئے
ایویں اینے خاب خیال نہ بن کڑیئے
کم تے جا کے پیسے چار کماواں گا
آندا ہویا راشن نال لیاواں گا
ساڈے ویڑھے دکھ دی تیز ہنیری اے
پیسے پیسے دی اج لوڑ ودھیری اے
دِھیے کل نوں ڈولی تینوں پانا اے
تھوڑا تھوڑا کر کے داج بنانا اے
ضد نہ کر تے کم تے مینوں جاون دے
جاکے کِتے دیہاڑی مینوں لاون دے
واہوا اوکھے ہوگئے دن غریباں دے
کم وی اج کل لبھدے نال نصیباں دے
سمجھدار ایں تینوں کیہ سمجھانا اے
دِھیے ڈاڈھا اوکھا داج بنانا اے
اِک گل میری چیتے رکھیں لاڈلیے
چھٹی ہندی اے وڈیاں سرکاراں دی
چھٹی ہندی اے سرمایے داراں دی
انج وی جہڑے اکثر موجاں کردے نیں
چھٹی کرکے افسر موجاں کردے نیں
نہ چپڑاسی نہ ای چوکیدارں دی
مرضی چلدی اے ایتھے ٹھیکیدارں دی
بھاویں ایہ دن ساڈے ناویں لگیا اے
ساہنوں اج تک ایتھوں کجھ نہ لبھیا اے
ساڈے ورگے بے بس تے مجبوراں دی
دِھیے چھٹی ہندی نہیں مزدوراں دی

اپنا تبصرہ گھلو