غزل

زین شکیل

گلاں باتاں کر بیٹھا واں ویلے سِر
بیڑی وانگوں تر بیٹھا واں ویلے سِر
ویلا لنگھیا تے فِر اکھاں کھلیاں نیں
میں خورے کیہ کر بیٹھا واں ویلے سِر
مویا ہاں تے دکھاں کھیہڑا چھڈیا اے
چنگا ہویا مر بیٹھا واں ویلے سِر
اوہنے مینوں بے اِتبارا کہنا سی
اکھ اِچ ہنجو بھر بیٹھا واں ویلے سِر
خواباں دی اک گٹھڑی اکھیاں چائی سی
خورے کتھے دھر بیٹھا واں ویلے سِر
ماڑی چنگی تے کیہ رونا کیہ ہسنا
جو کرنا سی کر بیٹھا واں ویلے سِر