غزل

حسین شاد

کجھ بھانبڑ لگے دل اندر کجھ راتاں وی سی قہر دیاں
کجھ بلدا جثہ اوہدا سی کجھ سدھراں نہیں سی ٹھہر دیاں
اوس بدیسن پار سمندروں پھیریا جس لے اکھاں نوں
کیہ دساں کیوں یاد آئیاں سن کجھ کڑیاں اپنے شہر دیاں
ایہہ لیکھیں ساڈے ڈوری سی ہن ملنا ڈاڈھا مشکل اے
کجھ پہرے لگے راہواں تے کجھ ٹٹیاں پلیاں نہر دیاں
کیہ لبھاں دارو بھکھاں دا کیہ چارا سگویں دکھاں دا
نہ خالص ہیرا چٹن نوں نہ خالص پڑیاں زہر دیاں
جد پیار وسایا دل اندر فر سارے رستے اکو نیں
کیہ ڈگراں اوہدے پنڈ دیاں کیہ سڑکاں تیرے شہر دیاں