جیون

آتش کیانی

جیون اک تماشا
جیویں ٹیشن رُکدی ریل
جیویں ساون پھٹدی ویل
جیویں پانی وچ پتاسا
جیویں کوڑے یار دی یاری
جیویں کنڈیاں بھری کنڈیاری
جیویں ریل’ جیل دی یاری
دم دا کیہ بھرواسا
جیون اک تماشا
نہ دو پل دو کر خار سجن
کوئی نہ جگ وچ یار سجن
کچے دھاگے وانگر ہوون
پرکھو قول قرار سجن
اوتھے دینا کس دلاسا
جیون اک تماشا
میں توں کٹھ پتلی یار
ڈاڈھے ہتھ مہار
میں کنج کراں نروار
ازلوں ایہو خاصا
جیون اک تماشا
لکھاں دنیا دار
ٹر گئے وارو وار
بھلنہار کل سنسار
اک تے کر بھرواسا
جیون اک تماشا