پنجابی نوں تعلیم دی زبان بناون لئی رل کے کم کراں گے:خیال احمد کاسترو

میں عقل کل نہیں‘رَل کے کم کراں گے‘ چھیتی ای تہانوں کم ہوندا نظر آوے گا: وزیر ثقافت پنجاب دا پنجابی سوجھواناں نال بیٹھک وچ اظہار خیال

لاہور(کلچرل رپورٹر) پنجابی زبان نوں پنجاب اندر تعلیم دی زبان بناون لئی رل کے کم کراں گے تے ایہدے لئی سنجیدگی نال جتن کیتے جاون گے۔ چھیتی ای تہانوں ایس بارے سنجیدگی نال کم ہوندا وکھالی دیوے گا۔ ایہناں وچاراں دا اظہار پنجاب دے ثقافت دے وزیر خیال احمدکاسترو ہوراں پنجابی لکھاریاں‘ سوجھواناں تے فنکاراں نال ملاقات سمے کیتا۔ ایس ملاقات دا پربندھ پیلاک ولوںکیتا گیا سی۔ پیلاک دی ڈائریکٹر جنرل ڈاکٹر صغرا صدف ہوراں ایس ملاقات دا پربندھ کیتا سی‘ اوہناں نے ای وزیر ثقافت نال پنجابی سوجھواناں دا اک اک کر کے تعارف کرایا۔ گل بات دا مڈھ رکھدے ہویاں پنجابی پرچاکار تے سوجھوان مدثر اقبال بٹ ہوراں آکھیا کہ ثقافت تے زبان دوویں پنجاب دا حِصّا نیں تے ایہناں دوہاں دے بغیر پنجاب دا تصور نہیں کیتا جا سکدا۔ اوہناں نے آکھیا کہ پنجابی ثقافت نوں زندا رکھن لئی بہت کجھ کرن دی ضرورت اے جد کہ حکومت ولوں ایس سلسلے وچ کیتیاں جان والیاں کوششاں ناکافی نیں۔ جمیل احمد پال نے آکھیا کہ پنجابی ادارے وسایل دے بغیر کم کر رہے نیں جد کہ سرکاری دفتراں وچ بیٹھے افسراں نوں ایس کم بارے کجھ پتا ای نہیں‘ اوہ ہر قسم دیاں کتاباںنوں اکو جہیا سمجھدے نیں تے اوہناں دے خیال وچ سارے ادارے صرف کتاباں ای چھاپدے نیں۔ ثقافت دے محکمے وچ ایسے افسر لائے جا￿ے چاہیدے نیں جہڑے کتاب پڑھن والے وی ہوون۔ اوہناں نے آکھیا کہ پنجابی پرچاکاری دا پنج فیصد کوٹا اج تیکر نہیں دتا گیا جس پاروں پنجابی اخبار بہت مسائل دا شکار نیں۔ احمد رضا پنجابی نے آکھیا کہ پنجابی ثقافت دے فروغ لئی ساڈے ولوں کیتے جان والے جتن سپھل کرن لئی پنجاب سرکار نوں ساڈا ساتھ دینا چاہیدا اے۔ آوندے پنجابی کلچر دیہاڑ اتے پنجاب سرکار نوں سنجیدگی نال کم کرنا چاہیدا اے۔ بابا نجمی ہوراں آکھیا کہ پنجاب سرکار نے ماں بولی دیہاڑ دے موقعے اُتے کجھ نہیں کیتا حالاں ایہ اک اہم دیہاڑ ہوندا اے۔ نعیم طاہر ہوراں اردو پنجابی تعلقات دے حوالے نال گل کیتی جد کہ راشد محمود نے آکھیا کہ میں ذاتی طور اُتے بہت کم کیتا اے جہدی قدر نہیں کیتی گئی۔ اقبال قیصر ہوراں آکھیا کہ حکومت ساڈے صرف تن کم کر دیوے۔ اک تاں ایہ کہ پنجابی زبان دی عزت بحال کروا دیوے تے سکولاں وچ پنجابی بولن اُتے لگی پابندی ختم کروائے۔ لاہور ہائی کورٹ دے فیصلے دے بعد پنجابی زبان دا بل اسمبلی وچ دو سال توں پیا اے‘ ایہنوں کڈھوا کے قانون بنایا جاوے۔ سارے ضلعیاں اندر آرٹ کونسلاں موجود نیں پر بند پئیاں نیں‘ اوہ کھولیاں جاون۔ پروین ملک ہوراں آکھیا کہ عدالتی احکامات دے بعد پنجابی زبان نوں رائج کرن دا بل اسمبلی وچ پیا اے‘ اوہنوں اگے چلایا جائے تاں جے قانون بن سکے۔ ڈاکٹر اعجاز انور ہوراں آکھیا کہ مینوں ترکی رہن دے دوران پتا لگیا کہ اوتھے سارا کم کار ترکی زبان وچ ہوندا اے۔ پنجاب اندر وی پنجابی نوں رائج کیتا جاوے۔ سوجھواناں دِیاں گلاں دے بعد ثقافت دے وزیر ہوراں اپنی گل بات کیتی اوہناں نے آکھیا کہ اپنی بنیاد بھل کے اسیں اپنا ای نقصان کردے آں۔ جہڑے بالاں نوں اپنی بنیاد توں دُور رکھیا جاندا اے‘ اوہ وڈے ہو کے اپنے ای وڈکیاں نوں نہیں پچھاندے۔ جہڑے بال اج دی تعلیم حاصل کردے نیں‘ اوہ وڈے ہو کے پنجابی تاں کیہ‘ اردو دے دو فقرے لکھن توں وی معذور ہوندے نیں۔ خیال احمد کاسترو ہوراں آکھیا کہ میں عقل کل نہیں‘ اسیں سارے پنجابی لئی رل کے کم کراں گے تے چھیتی ای تہانوں کم ہوندا نظر آوے گا۔ اوہناں نے آکھیا کہ میں تہاڈی اک اک گل لکھ لئی اے تے میں ایہ دعوا نہیں کردا کہ راتو رات سارے کم ہو جاون گے پر اسیں اک اک کر کے سارے کم کراں گے تے چھیتی ای تہانوں کم ہوندا نظر آوے گا۔