پنجابی اخباراں تے رسالیاں نوں اشتہاراں دا5 فیصد کوٹہ دتا جاوے گا: سیکرٹری اطلاعات

اسیں پاکستانی ہون دے نال نال پنجابی وی آں:ثمن رائے

سرکار اپنے فرض نبھائے تے پنجابی دا جھنڈا کدے نیواں نہیں ہو سکدا:مدثر بٹ

لاہور( نامہ نگار ) پنجابی دانشوراںتے صحافیاں دے نمایندہ وفد نے مدثر اقبال بٹ دی قیادت وچ سیکرٹری انفارمیشن پنجاب راجہ محمد جہانگیر تے ڈائریکڑجنرل پبلک ریلیشنز ثمن رائے ہوراں نال ملاقات کیتی۔ملاقات وچ پنجابی صحافت نال جُڑے مسائل دے نال نال پنجابی رہتل لئی منائے جان والے پنجاب کلچر ڈے دے حوالے نال گل بات ہوئی۔ وفد نے دسیا کہ پنجاب بھر دیاں تنظیماں رَل کے ایس دن نوں بھرویں طریقے نال منانا چاہندیاں نیں،تاں جے پنجابی رہتل توں دنیا دا ہر خطہ جانوہو سکے۔پچھلے سال وی ایس دیہاڑ نوں پنجابی تنظیماں نے گج وج کے منایا تے دنیا نوں دسیا کہ پنج دریاواں دی رہتل توں بِنا دنیادا ثقافتی حوالہ مکمل نہیں ہُندا۔ایس لئی سرکار ایس دن نوں ناصرف سرکاری سطح اُتے منائے بلکہ پنجابی نال جُڑیاں سب تنظیماں نوں وی رَلت دا کُھلا سدا دتا جاوے۔ایس عمل نال جتھے نویں نسل پنجابی دا جھنڈا اُچا رکھن دی تحریک نال عملی طور اُتے جُڑے گی اوتھے ای سرکار نال ورھیاں پرانا ایہہ گلہ وی دور ہووے گا کہ حکومتاں تے بیوروکریسی ہمیشہ پنجابی بولی تے رہتل دی حوصلہ شکنی کیتی اے۔
وفد نے ایہہ وی آکھیا کہ پنجابی اخباراں نوں اشتہاراں دا 5فیصد قنونی کوٹہ وی فراہم نہیں کیتا جا رہیا، جیہدے پاروں پنجابی اخبارمعاشی بدحالی دا شکار تے ماں بولی نالی جُڑے صحافی شدید مسائل دا شکار نیں۔
سیکرٹری انفارمیشن محمد جہانگیر تے ڈائریکٹر جنرل پبلک ریلیشنز ثمن رائے ہوراں وفد نوں یقین دوایا کہ پنجاب سرکار ولوں ہر شکل وچ پنجابی اخباراں نوں اوہناں دا پنج فیصد کوٹہ فراہم کیتا جاوے گا تاں جے پنجابی اخبار تے پنجابی کاز نوں زندہ رکھیا جا سکے۔میٹنگ وچ ایگزیکٹوڈائریکٹر لہور آرٹ کونسل ڈاکٹر محمد اسلم ڈوگر تے ڈائریکٹر ذوالفقار زلفی وی موجود سن تے وفد وچ مدثر اقبال بٹ ،پروفیسر ڈاکٹر جمیل احمد پال،احمد رضا وٹو تے قمر اعوان ہوریں شامل سن۔

اپنا تبصرہ گھلو