آکھن لوک سیانے

باہر دی ساری نالوں’ گھر دی ادھی چنگی
معنے: باہر دی: غیر ملکوں جاکے کمائی٭ساری: پوری
ویروا: ایس اکھان وِچ مت دِتی گئی اے پئی اپنے گھر وِچ رہ کے کِیتی گئی کمائی باہر جاکے چوکھا کمان نالوں چنگی ہوندی اے۔ ایس لئی پئی بندہ گھر دا گھر رہندا اے۔اتے اوہ ویلے اپنے بال بچے اتے بھین بھرانواں دے کول تاں رہندا اے۔
باہواں پِچھے ای بڑھکاں ماریاں جاندیاں نیں
معنے: باہواں پِچھے: طاقت دے بھروسے تے٭ بڑھکاں: شیخِیاں۔
ویروا: ایس اکھان وِچ مت دِتی گئی اے پئی غُصہ وی آکھدے نیں بڑا ای سیانا ہوندا اے اتے بس ماڑے تے ای آؤندا اے۔ہر کوئی اپنے جِیاں دے سِر تے ای کِسے نوں دھکو زوری اپنا زور وکھاندا اے’ کنڈ پِچھے کوئی نہ ہووے تاں بندے نُوں لڑن لگیاں اِک گل نہیں آؤندی۔
بتّیاں دنداں دی بھاکھیا خالی نہیں جاندی
معنے: بھاکھیا: تلاش’ وِچوں لنگھی ہوئی شَے
ویروا: ایس اکھان وِچ مت دِتی گئی اے پئی جو کُجھ وی بندے دے مُونہ وِچ پَے جاوے اوہ سمولچا کدی اگانہ نہیں لنگھ سکدا۔اوہ دنداں تھلھے چِتھیا ضروُر جاندا اے۔اِنج بندے نُوں چتھدیاں ای اوس کھادی جان والی چیز دا پتہ لگ جاندا اے۔
بجھدے پِچھے کوئی کَے تائیں بجھے
معنے: بجھدے: دؤڑدے٭کے تائیں: کدوں تیکر۔
ویروا: ایس اکھان وِچ مت دِتی گئی اے پئی بندہ اوہ جو کھلو کے اگلے دی گل سُن لوے اتے جے کوئی دؤڑدا ای جا رہیا ہووے تاں اوس نُوں گل سنان لئی بندہ کِنا کُو چِر اوسدے پِچھے نٹھ سکدا اے۔اوڑک ہف کے اوہ راہ وِچ ای رہ جاوے گا۔
بد چنگا’ بدنام بُرا
ویروا: ایس اکھان وِچ مت دِتی گئی اے پئی بندہ کِتے برائی کر لوے تاں مُفت دی بھنڈنا نالوں تاں چنگا ہوندا اے ۔ جو کرے وی کُجھ نہ اتے مُفت وِچ ای بدنام ہو جاوے اتے ہر پاسے لوک اوسدِیاں ای گلاں کردے ہون۔٭٭