’’ بال ادب‘‘ دے بے تاج بادشاہ، پروفیسر مجیب ظفرا نوار حمیدی

اوہناں ہزاراں دی گنتی وچ بالاں واسطے کہانیاں، نظماں تے ڈرامے لکھے جو مختلف اخباراں تے میگزیناں وچ چھپدے رہے

لكهت:اختر سردار چودھری

کئی دناں توں سوچ رہیاں واں کہ جے میں کسے علمی و ادبی شخصیت دی وفات دے بعد ایہناں لئے لکھاں تے کیہ لکھاں۔ دکھ تے غم دی ایس گھڑی وچ ایہناں نوں خراج تحسین پیش کراں تے کنج کراں؟انج ای کیوں ہوندا اے کہ کسے دے مرن دے بعد ایس دے بارے وچ اخباراں تے رسائلے وچ کالم تے خصوصی فیچر لکھے جاندے نیں۔ اسپیشل ایڈیشن کڈے جاندے نیں۔ ایس دی علمی و ادبی خدمات دے اعتراف اُتے خصوصی پروگرام کیتے جاندے نیںہمیشہ توں ای انج کیوں ہوندا اے۔ بالاں دے اک معروف ادیب پروفیسر مجیب ظفر انوار حمیدی دی وفات دے بعد میں سوچیا اے ہن زندہ ادباء دے بارے وچ لکھاں گا۔ انشاء اللہ
جویں کہ تسیں سب جان دے او پروفیسر مجیب ظفر انوار حمیدی بالاں دے معروف پاکستانی ادیب سن۔ آپ 24 اگست 1959 نوں کراچی دے علاقے لیاقت آباد وچ پیدا ہوئے۔ اصل ناں سید یوسف حسین جمال سی۔ پر ایہناں دے اصل ناں توں بوہت ای گھٹ لوک واقف سن۔ کئی اک وار میں سوچیا اے کہ ایہہ وڈے ادیب ہمیشہ ادبی ناں توں مشہور ہوئے بوہت گھٹ لوک اپنے اصل ناں توں مشہور ہوئے نیں پاکستان دے مشہور مزاح نگار دلاور فگار، مجیب ظفر دے چاچے سن جیہڑے برصغیر دے ممتاز مزاح گو شاعر سن۔ آپ دے والد دا ناں انوار حسین حمیدی تے والدہ دا ناں فاطمہ اختر نصیری اے۔
اوہناں نے 1974 وچ میٹرک دا امتحان پاس کیتا تے فیر ڈی جے سائنس کالج توں 1978ء وچ انٹر کیتا بعد وچ آپ نے جامعہ کراچی توں بی۔ اے تے ایسے جامعہ توں پی ایچ ڈی دی ڈگریاں حاصل کیتیاں۔ آپ نے ’’پاکستا ن اسٹیل کیڈٹ کالج‘‘، ’’آغا خان کالج‘‘، ’’کیڈٹ کالج پٹارو‘‘، ’’محمد علی جناح یونیورسٹی‘‘، ’’اردو کالج‘‘، ’’دہلی کالج‘‘ تے ’’سراج الدولہ گورنمنٹ ڈگری کالج‘‘ وچ وی پڑھایا۔ آپ ’’تابانی گروپس آف ٹیکنالوجی‘‘ وچ وی اردو ادب دے پروفیسر رہے آپ آرٹس کونسل آف پاکستان دی ادبی کمیٹی تے لائبریری کمیٹی دے رکن وی رہے۔
پروفیسر مجیب ظفر انوار حمیدی ہومیو پیتھک ڈاکٹر سن آپ نے ’’جناح میڈیکل کالج‘‘ توں ہومیو میڈیسنز وی پڑھیا۔ سرکاری تعلیمی افسر (پروفیسر اردو ادبیات و لسانیات) سن۔آپ پاکستان چلڈرن رائٹرز گلڈ تے حمیدی چلڈرن فائونڈیشن دے بانی وی سن۔ پاکستان دے علاوہ کیلی فورنیا ، واشنگٹن، برطانیہ تے چین وچ وی اردو ادب دی تعلیم دے چکے نیں۔ آپ نوں ’’وائس آف امریکا‘‘ تے ’’بی بی سی‘‘ (لندن) نے وی مدعو کیتا گیا سی۔
پروفیسر مجیب ظفر انوار حمیدی نے ہزاراں دی تعداد وچ بچیاں لئی کہانیاں، نظماں تے ڈرامے لکھے نیں۔ آپ نے ’’سائنسی ادب‘‘ وی لکھیا تے ’’بچوں کے ادب‘‘ دے تے بے تاج بادشاہ سن۔ اوہ اپنے آپ نوں ہمیشہ ’’وقف برائے بچوں کا ادب‘‘کہیا کردے سن اوہناں نے بالاں لئی 8000 توں زیادہ کہانیاں لکھیاں نیں۔
جیہڑے بالاں دے شائع ہون والے مشہور رسالیاں ماہ نامہ تعلیم و تربیت، ماہ نامہ ہمدرد نونہال، ماہ نامہ پھول، ماہ نامہ ساتھی، ماہ نامہ جنگل منگل، ماہ نامہ انوکھی کہانیاں وغیرہ وچ شائع ہوئی نیں۔ آپ نے بالاں دا بہترین ادب تخلیق کیتا۔ آپ دی لکھی ہوئی ساری کہانیاں بوہت پسند کیتیاں گئیاں۔ ایہناں دی مشہور تصنیفاں وچ گرم گرم روٹیاں ،لیجیئے آئس کریم کھائیے،بگلو کی چھٹیاں،چابی والی موٹر ،پراسرار صندوق،سب نے کہا شکریہ،حسن کی کہانیاں،بچوں کی کہانیاں ،میرے دوست (آپ بیتی) ،خون آلود خنجر (الحسن اکیڈمی)،غزلیہ (شاعری)،آتا ہے یاد مجھ کو (سوانح)،میرے دوست (سوانح دا دوسرا حصہ) وغیرہ شامل نیں۔
ملتان توں ڈاکٹر اسد اریب (بالاں دیادب اُتے پہلے پی ایچ ڈی ڈاکٹر ) نے پروفیسر مجیب ظفر انوار حمیدی دے فن تے شخصیت اُتے کئی کتاباں لکھیاں نیں جنہاں وچ ’’تذکرے و تبصرے‘‘، ’’نئے رجحانات، بچوں کے ادب میں‘‘ وغیرہ شامل نیں۔ بالاں دے ادب دا ایہہ ستارہ 12نومبر 2020 نوں ایس جہاں فانی توں رخصت ہویا۔ اللہ تعالیٰ مرحوم دی مغفرت فرمائے درجات بلند فرمائے تے جنت الفردوس وچ اعلیٰ مقام عطا فرمائے۔ آمین