جی بی انتخاب تے دھاندلی دا رولا

تحریر حمیداللہ بھٹی

جی بی عام انتخابات دے نتیجے ساہمنے آ چکے نیں نتیجے دے خلاف پی پی نے گلگت ڈی سی چوک وچ دھرنا دے رکھیا اے بدقسمتی نال انتخاب ہرن والی جماعت دھاندلی دا شور مچان لگدی اے حالاں کہ نتائج نوں تسلیم کرنا ای ووٹ دی عزت اے حالیہ انتخابات 2009 تے 2015 وانگوں شفاف تے منصفانہ نیں پیپلز پارٹی نے اپنے دور وچ 15 جد کہ مسلم لیگ ن نے 19 سیٹاں جُتیاں سن پر تحریک انصاف نوں مشکل نال 9 سیٹاں اُتے کامیاب ملی اے مشکل نال ایس لئی کہ اک سیٹ دوبارہ گنتی وچ لبھی اے۔
گلگت بلتستان دے ووٹر وفاق وچ حکمران جماعت نوں ویکھ کے ووٹ اُتے مہر لاندے نیں ایتھے علاقائیت، صوبائیت یا نسلی تعصب دی بجائے وفاق پرستی اے ایس تناظر وچ جے حاصل شدہ سیٹاں دے حوالے نا ل گل کیتی جائے تے تحریک انصاف دی کارکردگی بہتر نہیںآزاد حیثیت وچ جتن والیاں، خواتین تے ٹیکنو کریٹس ممبران نوں نال ملا کے حکومت بنان وچ کامیاب ہو جائے گی پر سچ ایہہ اے کہ لوکاں دے رحجان دے تناظر وچ حکمران جماعت دی کارکردگی بدترین اے۔
بلاول بھٹو تے مریم نواز وڈے وڈے جلسیاں دی بنا اُتے جت لئی پر امید سن خیر بلاول بھٹو نے تے قریہ قریہ شہر شہر جا کے جلسیاں نال خطا ب کیتا۔ مریم نواز نے وی اپنے امیدواراں دی جت لئی چنگے جلسے کیتے اجتماعات ویکھ کے پاکستان وچ سمجھ لیا گیا کہ گلگت بلتستان دی اگلی حکمرانی پی پی یا مسلم لیگ ن نوں ملے گی یا دونویں جماعتاں مل کے حکومت تشکیل دین گے شکست اُتے دونواں جماعتاں دھاندلی دا الزام لا رہیاں نیں عین ممکن اے پی ڈی ایم بیانیے وچ گلگت بلتستان دا نکتہ وی شامل ہو جائے پر سچ ایہہ اے کہ انتخابات ہر لحاظ نال منصفانہ تے شفاف ہوئے۔
جلسے جلسوس وچ کارکناں نوں متحرک کرن دا باعث ہوندے نیں پر ایہہ مقبولیت جانن دا مصدقہ پیمانہ نہیں پچھلے عام انتخابات وچ عمران خان دا گوجرانوالہ وچ تاریخ ساز جلسہ ہویا شرکا دی اینی وڈی تعداد سی جنہی پی ڈی ایم وچ شامل نو جماعتاں مل کے وی اکٹھی نہ کر سکیاں پر نتیجے وچ گوجرانوالہ توں تحریک انصاف دا کوئی اک امیدوار وی کامیاب نہ ہویا مسلم لیگ ن نے پورے ضلعے توں کلین سویپ کر لیا ایسے طرح سیالکوٹ دے جلسے وچ مردو زن دی بھاری تعداد ویکھ کے عمران خان وی مغالطہ کھا گئے پر ساری سیٹاں جتن دا دعویٰ تے اک پاسے تحریک انصاف نوں اک سیٹ وی نہ مل سکی رائے عامہ نوں حق وچ ہموار کرن لئی لازم اے کہ رہنما سیاسی نبض شناسی وچ تاک ہون۔ جدوں مریم نواز ایہہ کہن کہ سانوں بھاری اکثریت دلوائو تاں جے وفاقی حکومت ڈیگ سکیے تے کوئی عقل توں پیدل ای یقین کرے گا کیوں جے جس علاقے نوں ملک وچ اکائی دا درجہ حاصل نہیں نہ ای قومی اسمبلی تے سینٹ وچ نمائندگی حاصل اے اوہ کنج وفاق وچ حکومت بنان یا ڈیگن دے کم آ سکدا اے؟ پر ایہہ قیاس کر لینا کہ زیادہ سیٹاں دی وجہ عمران خان یا تحریک انصاف دی مقبولیت توں ہر گز ٹھیک نہیں ایہہ وفاق وچ حکمرانی دا انعام اے۔
گلگت بلتستان دے لوک شناخت لئی بے چین نیں آن جان لئی پاکستانی پاسپورٹ اُتے سفر کرن والیاں دی شہریت دی گل ہوئے تے شمالی علاقہ جات دے لوک کہیا جاندا اے ایہہ علاقہ دہائیاں توں شناخت دے ناں اُتے بلیک میل ہو رہیا اے۔ بلاول بھٹو دی جاندار مہم دے نال زیادہ سیٹاں حاصل کرن دی اک وجہ ایہہ وی اے کہ اوہناں نے صوبے دا درجہ دین دی گل کیتی جے اوہ الیکشن توں تن دن پہلاں مریم نواز دی سربراہی وچ مسلم لیگ ن دے وفد نال ملاقات دی غلطی نہ کردے تے اک ادھ مزید سیٹ مل سکدی سی کیوں جے پی پی دا ووٹر نواز شریف دامخالف اے ایسے طرح پی پی تے مسلم لیگ ن دی قیادت دی ملاقات دا نقصان حافظ حفیظ الرحمن نوں اپڑایا تے اوہ جتی ہوئی سیٹ ہر گئے وجہ مسلم لیگ ن دا ووٹر وی پی پی دے خلاف اے۔
عمران خان نے بطور وزیراعظم عبوری صوبہ دین دا اعلان کیتا تے لوکاں وچ ہلچل پیدا ہوئی ایسے اعلان توں متاثر ہو کے مسلم لیگ ن دے کئی مضبوط امیدوار جماعت نوں خیر باد کہہ کے تحریک انصاف وچ چلے گئے حالاں کے جماعت بدلن دا کوئی فائدہ نہ ہویا ایہناں تیکر کہ مقامی اسمبلی دے سابق اسپیکر ہر گئے کیوں جے باشعور ووٹراں نوں مفاد پرستاں دا محاسبہ کرنا آندا اے۔ بلاول بھٹو نے جی بی 21 توں وفاقی حکومت اُتے ووٹاں والے ڈبے چُکن دا الزام لایا اے حالاں کے ایتھوں نواز لیگ دے امیدوار غلام محمد کامیاب ہوئے نیں۔کیہ وفاقی حکومت اپنی بدترین مخالف تے ناقد جماعت نوں جتوان لئی بیلٹ باکس چُک سکدی اے؟
ووٹ نوں عزت دیو دا مطالبہ کرن والی کوئی جماعت گلگت بلتستان دے نتیجے دی روشنی وچ اداریاں نوں ہدف تنقید نہیں بنا سکدی کیوں جے حالیہ الیکشن وچ فوج نوں وکھرا رکھیا گیا تے کوشش کیتی گئی کہ پلس تے دیگر سویلین اداریاں دے تعاون نال انتظامات کیتے جان جدوں نتائج دے حوالے نال ہلہ گلہ شروع ہویا تے راجہ شہباز چیف الیکشن کمشنر نے دوبارہ گنتی کران وچ پس و پیش نہ کیتی بلکہ جس امیدوار نے وی دوبارہ گنتی دا مطالبہ کیتا چیف الیکشن کمشنر نے تحریری درخواست دین دی ہدایت کیتی تے جویں ای درخواست آئی فوری دوبارہ گنتی دا حکم صادر کر دتا ایسے لئی ہرن والے امیدواراں نال گل بات کریے تے اوہ دھاندلی دی بجائے اپنی شکست دے اسباب کجھ تے ای دسدے نیں پر کیہ کیتا جائے ساڈے کو کوئی ہار تسلیم کرن اُتے آمادہ نہیں حالاں کے ریٹائرڈ آئی جی نے بطور نگران وزیراعلیٰ پوری توجہ پرامن تے شفاف انتخابات اُتے مرکوز رکھی تے منصفانہ تے شفاف انتخابات دے علاوہ کسے نوعیت دے فیصلے توں گریز کیتا۔
تحریک انصاف نے عبوری صوبہ بنان داوعدہ تے کر لیا اے پر دیگر وعدیاں وانگوں ایس نے جی بی وچ وی ہوشیاری تے چالاکی توں فرار دی راہ تلاش کیتی تے یاد رکھنا چاہیدا اے کہ پورے ملک وچ سب توں زیادہ خواندہ علاقے دا سیاسی شعور پس ماندہ نہیں بوہت بہتر اے مالی وسائل دی دستوری تقسیم وچ گلگت بلتستان نوں نظر انداز کرن دی روایت دا لوک خاتمہ چاہندے نیں مسائل دی وجہ سابق حکومتاں نوں قرار دے کے عرصہ اقتدار لنگھان دی کوشش کیتی گئی تے اگلے عام انتخابات وچ جت لئی حالات مزید اوکھے ہو سکدے نیں اپوزیشن نال گل کرن توں وی گریزاں سادہ اکثریت توں قائم وفاقی حکومت کیہ آئینی ترامیم کر سکے گی؟ بظاہر اثبات وچ جواب دینا ٹھیک نہیں کیوں جے آئینی ترامیم لئی دو تہائی اکثریت ضروری اے جیہڑی اپوزیشن دے تعاون دے سوا ممکن نہیں۔