سوہنا، روشن تے خوشحال لہور،میری پہلی ترجیح: کمشنر لہور ذوالفقار احمد گھمن

لہور ڈویژن نوں وزیر اعلیٰ پنجاب دے احکامات دے مطابق مثالی بنایا جائے گا

انٹرویو: علی عمرا ن چٹھہ

ذوالفقار احمد گھمن اپنے دھیمے مزاج تے عوام دوست رویے پاروں کافی مقبول سمجھے جاندے نیں۔ کمشنر لہور دی تعیناتی توں پہلاں اوہ سیکرٹری ہائر ایجوکیشن پنجاب،کمشنر گوجرانوالہ ڈویژن، سیکرٹری محکمہ اوقاف، ڈائریکٹو سپورٹس بورڈ پنجاب سنے اہم پوسٹاں اُتے خدمات سرانجام دے چکے نیں۔ ذوالفقار گھمن نوں ایہناں دی کم وچ دلچسپی تے محنت دی وجہ نال خصوصی طور اُتے لہور وچ تعینات کیتا گیا تے اوہ وزیراعظم عمران خان تے وزیراعظم پنجاب سردار عثمان بزدار دے ویژن دے مطابق کم کرن لئی خاصے متحرک نیں پچھلے دناں روزنامہ بھلیکھا نال گل بات کردے ہوئے ایہناں دا کہنا سی کہ بوہت جلدی ہر تھاں تبدیلی نظر آئے گی عوام دی خدمت کراں گا تے ہر تھاں عوام نوں ریلیف دتا جائے گا۔ سرکاری اہلکاراں نوں حکومتی احکامات اُتے عمل کرن دا پابند بنایا جائے گا تے جد کہ دفتر ی کم دے حوالے نال کسے قسم دی کوتاہی ہر گزبرداشت نہیں کیتی جائے گی۔ لہور ڈویژن نوں وزیراعظم دے ویژن دے مطابق مثالی بنایا جائے گا۔ کمشنر لہور ڈویژن ذوالفقار گھمن نے صفائی دے ناقص انتظام اُتے اظہار خیال کردے ہوئے کہیا کہ ایل ڈبلیو ایم سی دی کارکردگی اُتے میں وی مطمئن نہیں تے صفائی دے حوالے نال سخت ہدایات جاری کر دتیاں نیں کمپنی دے سارے افسر صفائی نوں یقینی بنان لئی فیلڈ نوں آپ چیک کرن تے سارے ہاٹ سپاٹس نوں کلیئر کران۔اوہناں نے کہیا کہ لہور شہر نوں صفائی دے لحاظ نال ماڈل شہر ہونا چاہیدا اے۔ کمپنی دے کجھ انتظامی مسائل نوں حل کرن لئی پلاننگ جاری اے۔ ایس سلسلے وچ لہور سنے پوری ڈویژن دی روزانہ رپورٹ پیش کرن دی ہدایت کیتی اے۔ اوہناں نے مزید کہیا کہ سارے اے سیز تے سی اوز صفائی اُتے روزانہ چیک کر کے رپورٹنگ کرن گے۔ کمشنر لہور نے پین دے صاف پانی دے متعلق گل کردے ہوئے کہیا کہ وزیراعلیٰ سردار عثمان بزدار دی ہدایت اے کہ لہور سنے سارے ضلعیاں وچ گھٹ توں گھٹ ویلے وچ سارے فلٹریشن پلانٹ فعال کیتے جان۔ ڈپٹی کمشنر سارے فلٹریشن پلانٹس دے فعال ہون نوں چیک کر رہے نیں تے نویں لان دے نال نال پرانے پلانٹس دی فعالیت نوں یقینی بنا رہے نیں لہور شہر دے کل 99 فلٹریشن پلانٹس وچوں 65فعال کر دتے گئے نیں جد کہ 34 غیر فعال اُتے کم جاری اے۔ اوہناں نے کہیا کہ لہور دے شہریاں لئی آسانیاں تے سہولتاں دی فراہمی اُت کوئی غفلت نہیں ہونی چاہیدی۔ شہر نوں روشن صاف رکھن دے حوالے نال سوہنا، لہور پروگرام شروع کیتا گیا اے۔ ایس ویلے لہور دے سارے انڈر پاس روشن نیں شہر تے شاہرائواں نوں روشن بنایا جا رہیا اے۔ ایس سلسلے وچ فیلڈ دیاں ٹیماں تشکیل دتیاں گئیاں نیں جیہڑی روزانہ دی بنیاد اُتے رپورٹ دیندیاں نیں۔

جد کہ ایس دے علاوہ اوہناں نے ترقیاتی سکیماں دے بارے وچ گل کردے ہوئے کہیا کہ ہر ترقیاتی سکیم دا باقاعدہ افتتاح تے مقررہ مدت وچ تکمیل دی پابندی اُتے عملدرآمد کیتا جائے گا۔ وفاقی، صوبائی تے ضلعی سطح دی ہرترقیاتی سکیم نوں متعلقہ ڈی سی چیک کرن دی اتھارٹی اے، ایس دے معیار، کم دی رفتار تے مقررہ مدت وچ تکمیل نوں ڈپٹی کمشنر یقینی بنان گے۔ کمشنر لہور نے کہیا کہ ترقیاتی سکیم دا عوامی لوڑ ہون دی ڈی سیز تصدیق کرن گے تاں جے سرکاری خزانہ دا خرچہ شہریاں دی لوڑ دے عین مطابق ہوئے۔ کمشنر لہور ے دسیا کہ ڈی سیز کانفرنس وچ لہور دی 765شیخوپورہ 481،قصور 464 تے ننکانہ دی 120 سکیماں دا جائزہ لیا گیا اے۔ سپورٹس کمپلیکسز نوں مکمل کر کے کووڈ 19 دے بعد سپورٹس ایونٹ کرائے جان گے کہ لہور دی 765 وچوں 763 ترقیاتی سکیماں منظور ہو چکیاں نیں جد کہ لہور وچ 490سکیماں دے ٹینڈر تے 419دے ورک آرڈر جاری ہو چکے نیں۔ لہور وچ مہیا کل فنڈز دا 99 فیصد خرچ ہو چکیا اے۔ کمشنر لہور نے اسیں پی ایچ اے دے ہارٹیکلچر انسٹیٹیوٹ دی سکیم دی منظوری وی دتی تاں جے شہر نوں سرسز و شاداب بنایا جائے تے خوبصورت پھُلاں دی آرائش نال لہور دی خوبصورت وچ وادھا کیتا جا سکے۔اوہناں نے کہیا کہ فل ڈے ڈی سی کانفرنس وچ ترقیاتی سکیماں، ریونیو تے امور صحت اُتے ترجیحات نوں طے کیتا گیا، بوجوہ تعطل یاسست روی دے شکار امور اُتے ہن پوری توجہ مرکوز کیتی جائے گی۔ اوہناں نے زور دتا کہ عوامی منتخب نمائندے مسائل ہر صورت آگاہ کرن، حل کرن گے۔اسیں اپنے سارے وسائل نوں بروئے کار لیاواں گے۔ اوہناں نے ہدایت کیتی کہ سارے زونز وچ بیک وقت تجاوزات دے خلاف اپریشن کیتا جائے گا۔ اوہناں نے کہیا کہ پنجاب میونسپل سروسز پروگرام دے تحت تقریباً 2 ارب روپئے دی 253 ترقیاتی سکیماں نیں۔ میونسپل پروگرام دے تحت سکیماں اُتے کم تے ایہناں دی ویلے تکمیل اُتے کوئی تاخیر نہیں ہونی چاہیدی۔ شہر وچ وال پوسٹرز ہٹان تے بھکاریاں دے خلاف اپریشن جاری اے۔ تجاوزات دے خلاف حالیہ اپریشن دے دوران 24 لکھ جرمانہ عائد کیتا گیا اے۔ 2 لکھ 71 ہزار مربع فٹ ایریا سڑکا ں اُتے پیچ ورک مکمل کر لیا گیا اے۔ شہر وچ 2 لکھ 66 ہزار وچوں 1 لکھ 86 ہزار لائٹاں روشن نیں تے 14 وچوں 11 انڈر پاس ایس ویلے مکمل طور اُتے روشن جد کہ باقی تھاواں اُتے کم جاری اے۔ بھکاریاں دے خلاف وی اپریشن جاری اے۔ صوبائی دارالحکومت توں بھکاریاں دا خاتمہ کر کے رہاں گے درجناں پیشہ ور بھکاریاں نوں پھڑ کے اسسٹنٹ کمشنر نے متعلقہ حکام دے حوالے کیتا اے۔ ایم سی ایل دے افسر و اہلکار وی ضلعی انتظامیہ دے نال اپریشن وچ شریک نیں۔ کمشنر لہور ڈویژن و ایڈمنسٹریٹر بلدیہ عظمیٰ لہور ذوالفقار گھمن نے کہیا اے کہ ترقیاتی سکیماں دی بروقت تکمیل ترجیحات وچ شامل اے کیوں جے ہر سکیم شہری سہولتاں لئی بنائی جاندی اے۔ ترقیاتی سکیماں دا وڈا یا نکا ہونا ضروری نہیں، ایہناں دی ویلے تے تکمیل ضروری اے۔ اوہناں نے مزید کہیا کہ میگاپراجیکٹ لئی روڈکٹ دی بجائے ٹنل بورنگ جے ممکن اے تے اوہ کیتی جائے گی تاں جے ٹریفک مسائل گھٹ توں گھٹ سطح اُتے رہن۔ لہور دے سارے اداریاں توں رابطہ دے ذریعے ممکن بنایا جا رہااے کہ جلدی کسے میگاپراجیکٹ دے شروع ہون توں پہلاں ایس روڈ اُتے ترقیاتی سکیم نہ بنائی جائے گی تاں جے بجٹ ضائع نہ ہوئے۔ مرمت و بحالی نال ٹریفک نوں رواں رکھیا جائے۔

پنجاب میونسپل سروسز پروگرام دے تحت کل 215 نکیاں سکیماں نیں جنہاں وچوں 36 مکمل نیں۔ 11 زیر عمل نیں جد کہ 34 اُتے کم ہجے شروع نہیں ہویا تے 126 سکیماں اُتے ترقیاتی کم جاری نیں۔ اوہناں نے کہیا کہ پنجاب میونسپل سروسز پروگرام دی ساریاں سکیماں شہریاں دی سہولتاں وچ وادھا کرن گیاں۔ کمشنر لہور نے داتا دربار دی تعمیراتی پراجیکٹ دے حوالے نال گل بات کردے ہوئے کہیا کہ دربار داتا گنج بخش علی ہجویری دی سکیورٹی، خوبصورتی تے زائرین لئی سہولتاں وچ وادھا ہوئے گا۔ اوہناں نے کہیا کہ داتا دربار اُتے کم دا آغاز ہو گیا اے ایس دی باقاعدہ سنگ بنیاد دی تقریب وی منعقد ہوئے گی۔

اوہناں نے کہیا کہ پراجیکٹ اُتے کم شروع کرن لئی سارے ضروری اقدامات مکمل کیتے جا چکے نیں۔ دربار دے داخلی و خارجی راہواں اُتے چیکنگ دا خود کار نظام نصب کیتا جائے گا۔ دربار دے ساہمنے والی سڑک وی 8 توں 10 فٹ مزید کشادہ ہوئے گی۔داتا دربار دے نویں ڈیزائن توں دربار دے باہر ٹریفک دا بہائو وی تیز ہوئے گا۔ اپ لفٹ ڈیزائن اُتے 4 کروڑ 78 لکھ روپئے لاگت آئے گی جد کہ داخلی رستے اُتے خصوصی سکیورٹی وال وی بنے گی۔ کمشنر لہور نے کہیا کہ لاری اڈہ ڈرین تے انتظار گاہ دا کم جلدی شروع کیتا جائے گا لاری اڈہ بادامی باغ دی 220 کنال اراضی اُتے بساں دے نظام نوں جدید بنان دی بوہت لوڑ اے۔ سرکلر روڈ اُتے ڈرین اُتے کم شروع اے تے ہدایت کیتی اے کہ بہترین حالت وچ موجود سرکلر روڈ دے کئی حصیاں نوں بالکل نہ ادھیڑیا جائے۔ویران پئی شاہ غوث لائبیری نوں نویں سرے توں خوبصورت المطالعہ بنایا جائے گا۔ شاہ غوث لائبریری تاریخی تے ادبی اہمیت دی حامل اے، ایمپی تھیٹر وی بنایا جائے گا۔ لائبریری وچ خواتین لئی مخصوصی حصہ بنان لئی آرکٹیکٹ پلان زیر غور اے۔ ذوالفقار گھمن نے دسیا کہ حکومت نے ننکانہ صاحب بابا گورونانک دیوجی دے 551 ویں جنم دن دی تقریبات دے انتظامات سہولت بازاراں دے قیام دی بہتری سروسز مہیا کیتیاں جد کہ وزیراعلیٰ پنجاب دے حکم اُتے ڈی ایچ کیو ہسپتال، ترقیاتی سکیماں تے کرونا اقدامات دا جائزہ لین لئی اہم استھان دا آپ دورہ کیتا۔ کمشنر لہور نے دسیا کہ حکومت ولوں بابا گرونانک یونیورسٹی دا منصوبہ علاقے دی قسمت بدل دیوے گا ایس نال تعلیم نوں فروغ ملے گا۔

منافع خوری دے حوالے نال گل کردے ہوئے کمشنر لہور ڈویژن ذوالفقار گھمن دا کہنا سی کہ وزیراعلیٰ پنجاب دی ہدایت اُتے لہور سنے پوری ڈویژن وچ انتظامیہ نے پرائس چیکنگ دے حوالے نال مارکیٹاں تے ناجائز منافع خوراں دے خلاف کاروائیاں کیتیاں۔ پرائس چیکنگ تے ناجائز منافع خوری دے خلاف اک دن وچ مجموعی طور اُتے مارکیٹاں دی 3304 انسپیکشنز کیتیاں گئیاں ایس ویلے پورے لہور ڈویژن وچ پرائس چیکنگ تے آٹا سپلائی لئی ٹریک اینڈ ٹریس دے تحت لہور سنے پوری ڈویژن وچ کاروائیاں جاری نیں۔ آٹا سپلائی وچ غلط اعداد و شمار ظاہر کرن اُتے ڈسٹرکٹ فوڈ کنٹرولر لہور الغنی فلور ملز لہور دا فوڈ گرین لائسنس منسوخ کر دتا گیا۔ الغنی فلور ملز دے ڈیلر سٹور نوں روزانہ آٹا سپلائی دے غلط اعداد و شمار پھڑے گئے تے ملز انتظامیہ اطمینان بخش جواب نہیں دے سکی۔

میونسپل پروگرام دی 153 سکیماں دے ورک آرڈر الاٹ ہو چکے نیں جد کہ 46 ترقیاتی سکیماں مکمل ہو چکیاں نیں۔ ٹینڈز وچ تاخیر توں سکیم تاخیر تے سرکاری خزانے نوں نقصان نہیں ہون دتا جائے گا۔ میری ہدایت اُتے لہور سنے لہور ڈویژن دے دیگر ضلعیاں وچ پرائس چیکنگ لئی لہور، شیخوپورہ، ننکانہ صاحب تے قصور دے ڈی سیز نے بازاراں دے خصوصی دورے کر رہے نیں تے لہور سنے دیگر ضلعیاں دے پرائس مجسٹریٹس نے ماڈل بازاراں سنے عام مارکیٹاں، دکاناں تے ریڑھیاں نوں چیک کیتا جا رہیا اے۔ سرکاری نرخنامیاں نوں آویزاں نہ کرن اُتے متعدد بندیاں نوں وارننگ تے کئی نوں جرمانے عائد کیتے گئے نیں۔ ڈپٹی کمشنر ز نے سرکاری قیمتاں اُتے عملدرآمد تے کرونا اقدامات و آٹا دستیابی نوں چیک کر کے دستیابی نوں یقینی بنایا اے۔ اوہناں نے مزید کہیا کہ ایس ویلے لہور وچ کھان پین والیاں شیواں دی کسے قسم دی کمی نہیں تے نا ای گراں فروشی اے۔ ذوالفقار گھمن نے دسیا کہ پچھلے دناں یونیسکو دے وفد نے لہور دا دورہ کیتا جس دوران یونیسکو دے وفد نے یونیسکو دی ڈائریکٹر پیٹریشیا میکفلس دی قیادت وچ ملاقات ہوئی۔ ایس موقعے اُتے ڈائریکٹر یونیسکو پیٹریشیا میکفلس نے کہیا کہ لہور پاکستان دا واحد شہر اے جس نوں یونیسکو نے ’’شہر ادب‘‘ قرار دتا اے۔ لہور ادب و ثقافت لئی زر خیز اے ایتھے دے شعرا و ادبا عالمگیر شہرت دے حامل رہے نیں۔ ادبی سرگرمیاں عروج اُتے نیں۔ ایس موقعے اُتے کمشنر لہور نے کہیا کہ لہور ادب و ثقافت دا گہوارا اے۔ یونیسکو فہرست وچ شامل ہونا اعزاز اے۔

اوہناں نے کہیا کہ شہر ادب دے اعزاز دے تحت شہر وچ ادبی سرگرمیاں نوں فروغ ملے گا۔ یونیسکو دی شہر ادب فہرست وچ شامل دیگر شہراں توں وی موازنہ کراں گے اوہناں نے کہیا کہ لہور وچ ہون والی ہر ادبی سرگرمی شہر ادب دے عنوان اُتے ہوئے گی۔کمشنر لہور نے کہیا کہ یونیسکو دے نال رابطہ تے استفادہ دی سطح نوں بلند کیتا جائے گا۔ وزیراعظم پنجاب ولوں’’ہفتہ شان رحمت اللعالمین‘‘ دے سلسلے وچ سیرت النبی ﷺ اُتے علماء و مشائخ کانفرنس دا انعقاد کیتا گیا اے۔ جد کہ سرکاری و تعلیمی اداریاں وچ ایس طرح دی مزید نعتیہ تے تقریری تقریبات انعقاد کیتا گیا۔ کمشنر لہور نے کہیا کہ ساڈے آخری نبی ﷺ نوں سارے جہاناں لئی رحمت بنا کے گھلیا گیا اے۔ اسیںای کیہ حضور ؐ دی شان وچ خالق کائنات تے ایہناں دے فرشتے درود گھلدے نیں۔ خاتم النبین ؐ دی تعلیمات پوری دنیا لئی امن، محبت تے انسانیت دی نجات دا راہ نیں۔ کمشنر لہور نے کہیا کہ جس طرح اسیں سب جان دے آں کہ کرونا دی دوجی لہر دا وار جاری اے اسیں پہلے وی ایس آفت دا مقابلہ کیتا سی تے ہن وی ایہنوں ہر صورت شکست دیاں گے پر ایس لئی عوام نوں ساڈا ساتھ دینا ہوئے گا تے کرونا دی ایس او پیز اُتے سختی نال عمل کرنا ہوئے گا۔ حکومتی ہدایات اُتے عمل نہ کرن والیاں دے خلاف سخت ایکشن لیا جا رہیا اے جد کہ ایس سلسلے وچ روزانہ دی بنیاد اُتے ڈپٹی کمشنرز توں اپ ڈیٹس لیاں جا رہیاں نیں۔ آخر وچ اوہناں نے کہیا کہ سانوں حکومت نے عوام دی خدمت لئی تعینات کیتا اے عوام بلا روک ٹوک کسے وی مسئلے دے حل لئی ساڈے نال رابطہ کر سکدے نیں۔