حکومت گئی

پی ڈی ایم دے بقول حکومت ووٹ چوراں تے سلیکٹڈ دا ٹولہ اے

تحریر۔شمع باسط

2020 توں ای اسیں حکومت دے جان تے پی ڈی ایم دے آن دی گل سن رہے آں، ایہہ پی ڈی ایم آخر کیہ تے کیوں حکومت نوں چلدا کرنا چاہندی اے۔ بقول حکومت دے پی ڈی ایم دا اک انج دا ٹولا اے جیہڑا کہ چوراں ڈاکوئواں تے لٹیریاں اُتے مبنی اے جد کہ پی ڈی ایم دے بقول حکومت دا ووٹ چوراں تے سلیکٹڈ دا ٹولہ اے ۔ ایہناں دونواں پارٹیاں وچ کیہ کسے نوں ایہہ وی خبر اے کہ عوام ایہناں دونواں پارٹیاں یعنی حکومت تے اپوزیشن دی بیان بازی توں بالکل بے خبر نیں ایہناں نوں تے مہنگائی دی کھان پین دی گزر بسر دی فکر اے کہ ایہنوں کنج پورا کرنا اے۔ عوام نوں کوئی فرق نہیں پیندا کہ پی ڈی ایم حکومت نوں لے ڈبے یا حکومت پی ڈی ایم ٹیم نوں لے ڈبے روز روز دی بیان بازی حکومت آئی ، حکومت گئی دی اے صرف ایہہ ای خبراں نیں جیہڑی ہ عوام لئی رہ گئی اے کیہ ساڈا کسے چنگی خبر اُتے کوئی حق نہیں، کیہ اسیں نہیں چاہندے کہ فلاحی کماں ول توجہ دتی جائے، ساڈے لئی چنگے عوام دوست پیکجز متعارف کروائے جان کدی عمران خان ولوں ایہہ بیان سنن نوں ملدا کہ چائنا دی طرز اُتے ترقی ہوئے گی کتھے گئیاں اوہ ترقیاں ، کتھے گئی اوہ ریاست مدینہ عوام دے ساہمنے لیایا جائے کہ اسلام آباد وچ دن دہاڑے نوجوان دے قتل ہون دی اصل وجہ کیہ اے لہور وچ دو بھیناں دے قتل دی حقیقت کیہ اے، موٹروے زیادتی کیس دا کیہ بنیا کتھے نیں ایس دے اصل مجرم اسیں جاننا چاہنے آں بوہت افسوس ہوندا اے کہ جدوں میڈیا ریٹنگ دے چکر وچ ہر خبر کجھ دن تے چک کے رکھدا اے پر جویں ای خبر پرانی ہو جاندی اے تے میڈیا بلکل بھُل جاندا اے۔ شاید میڈیا اُتے وی دبائو ہوئے گا میڈیا دی وی مجبوریاں ہوندیاں ہون گیاں کیہ میڈیا وی آزادی رائے دا اختیار نہیں رکھدا، کیہ میڈیا وی کمزور اے کدی مذہب دا تے کدی لسانی بنیاد اُتے کدوں تیکر لوک شہید ہوندے رہن گے ۔ مولانا فضل الرحمن فرماندے نیں کہ سٹیٹ کتھے اے، مولانا صاحب پی ڈی ایم دے پلیٹ فارم توں تے تہانوں سٹیٹ نظر آندی اے پر ہزارہ واقعہ دے بعد تہانوں سٹیٹ کیوں نہیں نظر آ رہی، اسیں ایہہ نہیں کہندے کہ حکومت دی وجہ نال ددھ تے شہد دیاں نہراں وگن لگ گئیاں نیں پر دشمن دے حملیاں نال سٹیٹ الرٹ جاری کردی رہندی اے بحیثیت مسلمان تے پاکستانی ہر بندا افسردہ اے تکلیف وچ اے۔
سانحہ ہزارہ اُتے پر مولانا صاحب ہر واقعے اُتے تنقید ہر شے دا حل نہیں ہوندی کوئی وی پاکستانی پاکستانیاں نوں تکلیف وچ نہیں ویکھ سکدا، اللہ پاکستان نوں محفوظ رکھے پاکستان اے تے اسیں سب آں عوام ہن حکومت تے پی ڈی ایم دے ڈرامیاں توں نراض نیں چک چک توں تنگ آ چکے نیں کہ اج حکومت آئی اج حکومت گئی۔ 22 سال دی جدوجہد دے بعد جے حکومت آ ای گئی اے تے پنج سال دی مدت پوری کرن دیو بعد وچ عوام فیصلہ آپ کرے گی کہ ووٹ دی طاقت نال کس نوں دوبارہ لیانا اے تے کس نوں گھر گھلنا اے اسیں آپ تبدیلی خواہاں وچ آں پر تبدیلی نظر آئے وی تے گل فیر اوہ ای کہ حلوہ گرم گرم نہیں کھانا چاہیداتے اپوزیشن جیہڑی کہ پہلے ای قریب المرگ اے نال گزارش اے کہ فائدہ کوئی نہیں حکومت نوں چھیڑن دا تے نہ ای تہاڈے اتحاد وچ کوئی انج دی اہم گل اے کہ وزیراعظم استعفیٰ دین، تسیں سب اپنے اپنے عدالتی کیساں اُتے توجہ دیو تے اپنے آپ نوں صادق تے امین ثابت کرئو، باقی فیر عوام جانے تے حکومت ویکھنے آں ووٹ نوں عزت ملدی اے یا فیر کرکٹ نوں، کرکٹ توں یاد آیا نیوزی لینڈ دا دوہ کر کے ساڈی کرکٹ ٹیم تاریخی ناکامی دے بعد وطن واپس آن والی اے تے ایس توں پہلاں قومی کھلاڑیاں نے اک دوجے اُتے الزاماں دا طوفان بدتمیزی چک رکھیا اے کھلاڑی جیہڑے کہ ہر ملک دا سفیر ہوندا اے آپس وچ ایس قسم دی زبان استعمال کرن گے تے باقی لوکاں دا کیہ حال ہوئے گا اک امید سی کہ 2021 وچ شاید کجھ بہتری آئے تے اسیں ثابت قدم متحد قوم وانگوں مضبوطی دے نال نویں سال وچ داخل ہوواں گے پر فیر اوہ ای اپوزیشن تے حکومت دے اک دوجے نوں ساس بہو والے طعنے تے پریس کانفرنس بامقابلہ پریس کانفرنس جاری و ساری اے عوام چاہندی اے کہ سکھ داساہ آئے تے چنگی خبراں سنن نوں ملن ویکھنے آں پاکستان دے حالات کدوں چنگے ہون گے اسیں سب پاکستان دی سلامتی لئی دعا گو آں۔